Azərbaycan mədəniyyətinin beşiyi, görkəmli musiqiçi, memar, rəssam və ədiblərin, dünya mədəniyyət xəzinəsinə böyük töhfələr vermiş şəxsiyyətlərin vətəni olan Şuşa təməli qoyulduğu vaxtdan bu yana – bütün dövrlərdə Azərbaycanın tarixində xüsusi yerə sahib olmuşdur. Qala – şəhər hər zaman Qarabağda varlığımızın və geniş anlamda Azərbaycanın suveren, sərhədi bütöv dövlət kimi varlığının təcəssümüdür.

Məlum olduğu kimi Azərbaycan Respublikasının Prezidenti cənab İlham Əliyevin 2021-ci il 7 may tarixli Sərəncamı ilə Şuşa şəhəri ölkənin mədəniyyət paytaxtı elan edilmiş, şəhərin əsl tarixi simasının bərpası yönündə nəhəng layihələr gerçəkləşdirilmişdir. Daha sonra Şuşa şəhərinin “2023-cü il üçün “Türk dünyasının mədəniyyət paytaxtı” elan edilməsi ilə bağlı cənab Prezident İlham Əliyev tərəfindən 6 dekabr 2022-ci il tarixli Sərəncam imzalanaraq,  memarlıq və şəhərsalma sənətinin 270 illik tarixə malik parlaq incisi olan və Azərbaycan xalqı üçün yüksək mədəni-mənəvi dəyər kəsb edən Şuşaya xüsusi ehtiramın təzahürü kimi bu qərar bütün türk dünyasının birlik və həmrəyliyinin yeni rəmzinə çevrilməklə, türk xalqları arasında əməkdaşlıq perspektivlərinin daha da genişləndirilməsi işinə öz töhfəsini vermişdir. 

Eyni zamanda Şuşa şəhərinin 2024-cü il üçün “İslam dünyasının mədəniyyət paytaxtı” elan edilməsi ilə bağlı tədbirlər haqqında  Azərbaycan Respublikasının Prezidenti cənab İlham Əliyevin 21 noyabr 2023-cü il tarixli Sərəncamı Azərbaycanın tarixi-mədəni, ictimai-siyasi həyatının mühüm mərkəzlərindən biri olan İslam mədəniyyətinin zənginliklərini dolğun təzahür etdirən Şuşaya xüsusi ehtiramın ifadəsi olmuşdur.

Ardıcıl tədbirlərin davamı olaraq Şuşa şəhərinin 2024-cü il üçün “İslam Əməkdaşlıq Təşkilatının gənclər paytaxtı” seçilməsi ilə bağlı tədbirlər haqqında Azərbaycan Respublikası Prezidenti Cənab İlham Əliyev tərəfindən 17 aprel 2024-ci il tarixli  Sərəncam imzalanmışdır. Sərəncamda qeyd edilir ki, 2023-cü il noyabrın 10-da Türkiyə Respublikasının İstanbul şəhərində keçirilmiş İslam Əməkdaşlıq Təşkilatının Gənclər Forumu İcraiyyə Şurasının 11-ci iclasında Azərbaycanın mədəniyyət paytaxtı Şuşa şəhəri yekdilliklə İslam Əməkdaşlıq Təşkilatının “Gənclər Paytaxtı 2024” Beynəlxalq Proqramına 10-cu ev sahibi seçilmişdir.

Bu bir daha göstərir ki, 2024-cü il Şuşa üçün əlamətdar və yaddaqalan olacaqdır. Gənclər paytaxtı kimi bu qədim şəhər cəmiyyətin aparıcı qüvvəsi olan gənclərimiz üçün qlobal məsələlərin müzakirəsi baxımından real məkana çevriləcəkdir. Respublikamızın uğurlarının dünyaya çatdırılmasında ölkə gəncləri daha fəal olacaq, Şuşadan dünyaya növbəti mesajını verəcək, Azərbaycan bölgədə genişmiqyaslı inkişafa, çoxşaxəli əməkdaşlığa töhfə verməyə davam edəcəkdir.

Qeyd edilir ki, Azərbaycan Respublikasının Prezidenti cənab İlham Əliyevin rəhbərliyi ilə davam etdirilən uğurlu gənclər siyasəti nəticəsində ölkəmizdə layiqli gənclər yetişir. Ötən dövr ərzində gənclər siyasəti və gənclərlə iş sahəsində bir sıra mühüm nəticələr əldə edilmişdir. Həyatın bütün sahələrində gənclərin fəallığı, təşəbbüskarlığı, irimiqyaslı layihələrin icrasında və idarəetmədə rolu artmış, vətənpərvərlik ruhu və vətəndaşlıq mövqeyi möhkəmlənmişdir.

Son illərdə gənclərlə bağlı Dövlət Proqramlarının qəbul edilməsi, İnkişaf Strategiyasının təsdiq olunması, Gənclər Fondunun yaradılması və digər tədbirlər onu göstərir ki, ölkə rəhbəri gənclərimizin öz bilik və bacarıqlarını üzə çıxarmalarına, potensiallarını effektli reallaşdırmalarına, cəmiyyətdə layiqli yer tutmalarına münbit şərait yaradıb.

Gənclər siyasətinin həyata keçirilməsində yerli özünüidarəetmə orqanlarının iştirakı da labüddür. Yerli özünüidarəetmə orqanları öz səlahiyyətləri daxilində gənclərin sosial-hüquqi müdafiəsinə yönəlmiş proqramlar hazırlayıb həyata keçirə bilərlər. Bu proqramlar əsasında qəbul olunan qərarlar gənclər siyasətinin məqsəd, prinsip və istiqamətlərinə uyğun olmalıdır. Son illər gənclərlə iş və idman komissiyalarının yaradılması ilə bağlı müvafiq işlər başlanılsa da,  ölkə üzrə bütün bələdiyyələri əhatə edə bilməmişdir.  Odur ki, yerli əhəmiyyətli məsələlərin həllində vacib rol oynayan bələdiyyələr bu sahəyə də diqqəti artırmalıdır. Çünki gənclər dövlətimzin  gələcəyi, işıqlı sabahıdır.

Göstərilənləri  nəzərə alaraq Şuşa şəhərinin 2024-cü il üçün “İslam Əməkdaşlıq Təşkilatının gənclər paytaxtı” seçilməsi ilə bağlı tədbirlər haqqında Azərbaycan Respublikası Prezidenti Cənab İlham Əliyev tərəfindən 17 aprel 2024-ci il tarixli  Sərəncam ilə bələdiyyə üzv və qulluqçularının ətraflı  məlumatlandırılması, yerli səviyyədə təşkil olunacaq ədəbi-mədəni tədbirlər, maarifləndirici görüşlər zamanı bu barədə yerli əhalinin məlumatlandırılması  tövsiyə olunur.

 Bələdiyyələrlə iş mərkəzi