“Ölkəmizdə regional inkişafda yerli özünüidarəetmənin rolunu artırmalıyıq”.

Bu fikirləri Milli Məclisin Regional məsələlər komitəsinin təşkil etdiyi “Yeni Azərbaycan Partiyasının VIII Qurultayında Azərbaycan Respublikasının Prezidenti İlham Əliyevin çıxışından irəli gələn regional inkişaf və yerli özünüidarəetmə sahəsində vəzifələr və çağırışlar” mövzusunda keçirilən konfransda Milli Məclisin İqtisadi siyasət, sənaye və sahibkarlıq komitəsinin sədri Tahir Mirkişili səsləndirib.

Azərbaycanın unitar dövlət olduğunu və qərarların böyük hissəsinin mərkəzi səviyyədə qəbul edildiyini vurğulayan Tahir Mirkişili bildirib ki, ölkəmizdə mərkəzləşdirilmiş idarəetmə sisteminin mövcudluğu tamamilə təbiidir. Bununla belə, mərkəzi idarəetmənin səmərəliliyi qəbul edilən qərarların yerlərdə nə dərəcədə keyfiyyətlə icra olunmasından da asılıdır.

Komitə sədri hesab edir ki, problemləri daha yaxından tanıyan yerli strukturlarla mərkəzi idarəetmə orqanları arasında koordinasiyanın gücləndirilməsi bu gün qarşıda duran əsas məsələlərdən biridir.

Deputat qeyd edib:

“Düşünürəm ki, bu sahədə bələdiyyələrin üzərinə də mühüm vəzifələr düşür. Yerli idarəetmədən danışarkən, əlbəttə ki, bələdiyyələri də nəzərdə tuturuq.

Bələdiyyələrin fəaliyyətində insanlara xidmət göstərməklə yanaşı, maarifləndirmənin və şəffaflığın artırılması da mühüm əhəmiyyət daşıyır.

Biz də millət vəkilləri olaraq insanlarla görüşür, onların müraciətlərini dinləyirik. Vətəndaşlar bir çox məsələlərlə bağlı bizə müraciət edirlər və biz də zəruri hallarda bələdiyyələrlə əlaqə saxlayırıq.

Fürsətdən istifadə edərək qeyd etmək istəyirəm ki, bugünkü tədbirdə Sumqayıt Bələdiyyəsinin sədri də iştirak edir. Hesab edirəm ki, millət vəkilləri ilə bələdiyyələr arasında əməkdaşlığın ən yaxşı nümunələrindən birini Sumqayıtda görmək mümkündür. Hətta bir çox vətəndaş qəbullarımızda bələdiyyə nümayəndələri də iştirak edirlər.

İnanıram ki, aramızda səmərəli əməkdaşlıq modeli formalaşıb və bu imkanlardan daha geniş istifadə etmək lazımdır”.

Belediyye.info

P.S. Sumqayıt bələdiyyəsinin sədri də konfransda iştirak edib. Şəkildə ortada Sumqayıt bələdiyyəsinin sədri Adil Xudadatovdur.