“Etiraf etmək lazımdır ki, Prezident İlham Əliyevin Yeni Azərbaycan Partiyasının VIII qurultayında səsləndirdiyi və haqqında burada çox yüksək fikirlər bildirilən məlum çıxışında Azərbaycanın keçmişi və müasir reallıqları ilə yanaşı, daha çox ölkəmizin gələcəyi, bu gələcəyin necə təmin edilməsi və necə qorunması məsələləri ön plana çəkilir.

Bu kontekstdə mühüm rol oynaya biləcək qurumlardan biri də regional inkişaf və özünüidarəetmə məsələləri ilə məşğul olan bələdiyyələrdir.”

Bu fikirləri Milli Məclisin Regional məsələlər komitəsinin təşkil etdiyi “Yeni Azərbaycan Partiyasının VIII Qurultayında Azərbaycan Respublikasının Prezidenti İlham Əliyevin çıxışından irəli gələn regional inkişaf və yerli özünüidarəetmə sahəsində vəzifələr və çağırışlar” mövzusunda keçirilən konfransda Milli Məclis sədrinin birinci müavini Əli Əhmədov deyib.

Əli Əhmədov qeyd edib ki, son illər ərzində Azərbaycanda bələdiyyələrin fəaliyyəti əhəmiyyətli dərəcədə təkmilləşib. Xüsusilə bələdiyyə fəaliyyətinin saflaşması istiqamətində görülən işləri xüsusi vurğulamaq istəyirəm. Bu, bələdiyyələrin daha sağlam bünövrə üzərində fəaliyyət göstərməsi üçün çox etibarlı imkan yaradıb.

Deputat daha sonra qeyd edib:

“Güman edirəm ki, bundan sonra da bələdiyyələrin fəaliyyətinin və bu fəaliyyətin əsaslarının genişləndirilməsi istiqamətində işlər davam etdiriləcək. Müvafiq qurumlar, o cümlədən Ədliyyə Nazirliyi və digər dövlət orqanları bu istiqamətdə apardıqları işi davam etdirəcək və ürəkaçan nəticələr əldə olunacaq.

Təbii ki, Prezident İlham Əliyevin səsləndirdiyi fikirlərin əhəmiyyətli bir hissəsi Azərbaycanın, xalqımızın, xüsusilə də gənclərimizin əxlaqi və mənəvi dəyərlər əsasında tərbiyə olunması, bütövlükdə ideoloji sağlamlaşma məsələləri ilə əlaqədardır. Eyni zamanda, Prezident açıq şəkildə onu da vurğulayırdı ki, istənilən ideoloji inkişaf və təkmilləşmə müəyyən bir baza üzərində qurulmalıdır. Həmin bazanın formalaşmasında, inkişafında və təkmilləşdirilməsində müxtəlif qruplarla yanaşı, bələdiyyələr də mühüm rol oynayırlar.

Bu gün  bələdiyyələrin qarşısında duran vəzifələrə ayrıca diqqət yetirmək lazımdır. Hazırda  bələdiyyələr artıq yeni mərhələyə qədəm qoyublar. Lakin bu, gələcəyə keçid mərhələsidir. Hesab edirəm ki, müvafiq qurumlar da bu istiqamətdə düşünürlər.

İndi bu barədə bir neçə fikir bildirmək istəyirəm.

Birincisi, qarşımızda duran əsas vəzifələrdən biri, o cümlədən bələdiyyələrin regional inkişaf baxımından üzərinə düşən başlıca vəzifə iqtisadi inkişafın təmin edilməsidir. Heydər Əliyevin məşhur bir kəlamı var. Güman edirəm ki, hamınız bunu yaxşı xatırlayırsınız: “İqtisadiyyatı güclü olan dövlət hər şeyə qadirdir”.

Hər şey iqtisadiyyatın üzərində qurulur. Mənəvi inkişaf da öz kökünü iqtisadiyyatdan, iqtisadi gücdən götürür. Bu mənada bələdiyyələr regional səviyyədə iqtisadi göstəricilərin yaxşılaşdırılmasında mühüm rol oynamalı olan və bu rolu yerinə yetirmək potensialına malik qurumlar kimi formalaşıblar. Güman edirəm ki, bundan sonra da bu istiqamətdə fəaliyyətlərini gücləndirəcəklər.

İkincisi, iş yerlərinin yaradılması məsələsidir. Təbii ki, iqtisadiyyatın ən mühüm göstəricilərindən biri ölkədəki iş yerlərinin sayıdır. Bu istiqamətdə də regional kontekstdə bələdiyyələrin üzərinə mühüm vəzifələr düşür. Buna görə də istər onların funksiyalarının genişləndirilməsi, istərsə də təşəbbüskarlığının artırılması baxımından fəaliyyətlərinin genişləndirilməsinə ciddi ehtiyac var.

İnfrastruktur məsələsinə gəldikdə, bu gün bələdiyyələr, burada da qeyd olunduğu və səsləndirilən fikirlərdən göründüyü kimi, öz ərazilərində infrastrukturun yaxşılaşdırılması istiqamətində daha çox iş görə bilirlər. Çünki bunun üçün müəyyən imkanlar artıq formalaşıb. Güman edirəm ki, bundan sonra onların bu istiqamətdə görəcəkləri işlərin həcmi daha da artacaq.

Bu gün yerli və regional səviyyədə müəyyən vəzifələrin həyata keçirilməsində bələdiyyələr mühüm rol oynayırlar. Bu da onların təşəbbüskarlığından və, təbii ki, funksiyalarının genişləndirilməsindən asılıdır.

Nəhayət, Prezidentimizin də dəfələrlə qeyd etdiyi kimi, regional inkişafın və yerli özünüidarəetmənin təkmilləşdirilməsi məsələsi xüsusi əhəmiyyət daşıyır. Bu kontekstdə hesab edirəm ki, yaxın gələcəkdə bələdiyyələrin səlahiyyətlərinin genişləndirilməsi istiqamətində daha ciddi addımların atılmasına ehtiyac var.

Bu mənada bələdiyyələrin üzərinə düşən vəzifələr çox məsuliyyətlidir. Bununla yanaşı, hesab edirəm ki, bələdiyyələrin funksiyalarının və səlahiyyətlərinin daha da genişləndirilməsinə ehtiyac var.

27 il ərzində Azərbaycanda bələdiyyələrin inkişafı, xüsusilə əhali ilə ünsiyyət qurmaq, idarəçilik və təşkilatlanma bacarıqlarının artması mühüm bir bünövrə yaradıb. Bu bünövrə bələdiyyələrə daha geniş səlahiyyətlərin verilməsinə və onlardan daha çox nəticə gözlənilməsinə imkan yaradır.

Hesab edirəm ki, istər Ədliyyə Nazirliyi, istər digər müvafiq qurumlar, istərsə də Milli Məclis və qanunverici orqan bu istiqamətdə fəaliyyətlərini bundan sonra da davam etdirəcəklər. Məqsəd Prezident İlham Əliyevin bütövlükdə cəmiyyətimizin qarşısında qoyduğu mühüm vəzifə və hədəflərin həyata keçirilməsində bütün qurumların, o cümlədən yerli özünüidarəetmə orqanlarının — bələdiyyələrin daha səmərəli fəaliyyət göstərməsini təmin etməkdir.”

Belediyye.info