2025-ci ilə daxil olarkən qarşımızda duran əsas məqsəd təkcə yeni layihələrə başlamaq deyildi. Əsas hədəf yerli idarəetmədə sistem qurmaq, real vergi bazası yaratmaq, maliyyə intizamını təmin etmək və bələdiyyənin imkanlarını şəhərin real ehtiyaclarına uyğun şəkildə yönəltmək idi. Biz aydın şəkildə anlayırdıq ki, bu nəticələr bir ilin işi ola bilməz. Buna görə 2024–2025-ci illəri mərhələli şəkildə baza quruculuğu dövrü kimi müəyyən etdik və bütün qərarlarımızı bu strateji çərçivədə formalaşdırdıq. Ötən  ilin yekununa görə yerli büdcənin mədaxil hissəsi 3.750.000 manat və ya proqnoz tapşırığının 191 faiz səviyyəsində icra edilmişdir. 2024-cü ildə yerli büdcə gəlirləri 3 milyon təşkil etmişdisə 2025-cı ildə yerli büdcənin gəlirləri 709.000 manat çox olmuşdur. Bələdiyyə əmlakının icarəyə verilməsindən gəlirlər növü üzrə yerli büdcəyə   1 .200 .000 manat məbləğində vəsait daxil olmuşdur ki, bu da proqnoz tapşırığının 176 faizini təşkil etmişdir. Bələdiyyə əmlakının özəlləşdirilməsindən gəlirlər tədiyyə növü üzrə yerli büdcəyə 1 700 000 manat məbləğində vəsait daxil olmuşdur. Bu da proqnoz tapşırığın 426 faiz deməkdir. “Fiziki şəxslərdən torpaq vergisi” isə proqnoz tapşırığı üzrə 302 000 manat və ya 317 faiz səviyyəsində icra olunmuşdur.“Fiziki şəxslərdən əmlak vergisi” tədiyyə növü üzrə yerli büdcəyə ötən ildə 896 000 manat məbləğində  vəsait  daxil  olmuş, proqnoz  tapşırığı 125 faiz səviyyəsində icra edilmişdir.

Sumqayıt Bələdiyyəsinin yerli büdcəsinin məxaric hissəsi  isə 3 185 000 manat təşkil etmişdir ki, bu da proqnoza qarşı 163 faiz deməkdir.

Bu göstəricilərin heç biri təsadüfi deyil. Əldə olunan nəticələr yalnız yığımların artırılması ilə məhdudlaşmır, eyni zamanda idarəetmə fəlsəfəsinin dəyişməsinin, yeni sistem yanaşmasının tətbiqinin real nəticəsidir. Bu mərhələdə bələdiyyələr üçün yaradılmış yeni mexanizmlərin və imkanların xüsusi rolunu qeyd etmək vacibdir. Azərbaycan Bələdiyyələrinin Milli Assosiasiyasları tərəfindən bələdiyyələrin istifadəsinə verilmiş vahid avtomatlaşdırılmış məlumat sistemi bütün bələdiyyələrin fəaliyyətində keyfiyyətcə yeni mərhələnin əsasını qoymuşdur. Sözügedən sistem bələdiyyələrə çıxarışların elektron formada əldə olunması,əmlak və torpaq üzrə məlumat bazasının vahid mərkəzdən idarə edilməsi, ödəyicilərin dəqiq uçotunun aparılması və insan faktorundan asılılığın minimuma endirilməsi imkanlarını yaratmışdır.Yeni sistemin tətbiqi nəticəsində bələdiyyə vahid,mərkəzləşdirilmiş və real vaxt rejimində yenilənən məlumat bazası əsasında fəaliyyət göstərməyə başlamışdır. Bu isə illərdir mövcud olan pərakəndə uçot,natamam məlumat və faktiki vəziyyətlə sənədlər arasındakı uyğunsuzluqları aradan qaldırmışdır.Nəticədə vergi ödəyicilərinin dairəsi genişlənmiş,uçotdan kənarda qalan obyektlər sistemə daxil edilmişdir.Bu da əmlak və torpaq vergilərinin hesablanmasında dəqiqliyi əhəmiyyətli dərəcədə artırmışdır.Yeni sistemin tərkib hissəsi kimi SMS bildiriş mexanizminin tətbiqi bələdiyyə ilə vətəndaş arasında əlaqəni daha şəffaf və operativ etmişdir. Artıq vergi ödəyicilərinə ödəniş məbləğləri,borclar və bildirişlər birbaşa SMS vasitəsilə çatdırılır, bu isə həm məlumatlandırmanı asanlaşdırmış,həm də könüllü ödənişlərin səviyyəsini yüksəltmişdir.Məqsəd inzibati təzyiq deyil, məlumatlandırma və məsuliyyətin formalaşdırılması olmuşdur.Bu yanaşma artıq sübut etmişdir ki,rəqəmsallaşma və vahid idarəetmə modeli bələdiyyələrin dayanıqlı inkişafının əsas açarlarından biridir. Qeyd etmək yerinə düşər ki, Azərbaycan Şəhər Bələdiyyələrinin Milli Assosiasiyasının sədri Təmraz Tağıyevin, habelə tədbirdə iştirak edən peşəkar tərəfdaşların,aidiyyəti qurumların nümayəndələrinin iştirakı bələdiyyələrarası əməkdaşlığın gücləndirilməsi baxımından mühüm əhəmiyyət kəsb edir.

Əldə olunan bu maliyyə göstəriciləri yalnız rəqəmlərdən ibarət deyil. Əsas məsələ ondan ibarətdir ki,yığılan vəsaitlərin necə və hansı istiqamətlər üzrə xərcləndiyi şəffaf və aydın şəkildə təqdim edilsin. Toplanan vəsaitlərin əsas hissəsi Sumqayıt şəhərində

Yaşayan əhalinin həyat keyfiyyətinin yüksəldilməsinə şəhər mühitinin sağlamlaşdırılmasına və sosial ehtiyacların qarşılanmasına yönəldilmişdir.

Bu prinsip əsasında ötən il ərzində bələdiyyənin Yerli Sosial İnkişaf Proqramı çərçivəsində şəhər ərazisində bir sıra mühüm layihələr icra edilmişdir. Bələdiyyənin sifarişləri əsasında şəhid Gəray Məmmədov küçəsinə 3500 kv.metr, Yaşma bağlarında Cavidan Mirzəyev küçəsinə 2000 kv.metr, Sumqayıtçay ərazisində yerləşən şəhid Kənan Allahverdiyev küçəsinə 2274 kv.metr, Sumqayıt stansiyası 12 saylı avtobus marşurutunun son dayanacağına 2000 kv.metr,Şəhid Coşqun Zeynallı küçəsinə isə 1000 kv.metr,33 saylı marşrut yoluna təsərrüfat və əhali sıxlığının yüksək olması nəzərə alınaraq,nəqliyyat və piyadaların hərəkətinin təhlükəsizliyinin təmin edilməsi məqsədilə 5000 kvadrat metr sahədə asfalt qoyulmuşdur.              Şəhərin 49 və 52-ci məhəllə, 10,13 və 18-ci mikrorayonlarının,bağlar zonasının, İnşaatçılar qəsəbəsi ərazilərinə  yeni asfalt örtüyü vurulmuşdur.

Bütövlükdə il ərzində 30.000 kv.metr yeni asfalt örtüyü vurulmuşdur.

Ötən il ərzində 21 iri və sosial əhəmiyyətli infrastruktur layihəsinin həyata keçirilmişdir. İl ərizində bələdiyyənin iri layihələrindən biri də şəhərin Sülh prospektində dəmir  məhəccərlərin quraşdırılması olmuşdur.Prospektin xiyaban  zolağında piyadaların təhlükəsizliyinin təmin edilməsi,eyni zamanda yol-nəqliyyat hadisələrinin qarşısının alınması məqsədilə İcra Başçımız Zakir müəllimin təklif əsasında və Sumqayıt Bələdiyyəsinin sifarişi ilə dəmir məhəccərlərin quraşdırılması layihəsinə başlanılmışdır.Layihənin ümumi dəyəri 260 000 manatdır. İcra olunmuş işlərin dəyəri 120 000 manat təşkil etmişdir.

 Hesabat ilində məhəllə komitələrinin və vətəndaş müraciətləri əsasında  şəhərin müxtəlif ərazilərində 20 qaranlıq küçəyə Sumqayıt şəhər “Küçə işıqları İdarəsi” ilə əməkdaşlıq çərçivəsində   217 ədəd küçə işıqları quraşdırılmışdır.Bu məqsədlə ilə yerli büdcədən 49.000 manat vəsait xərclənmişdir.

Bələdiyyə parkında yenidənqurma və landşaft işləri görülmüşdür.Park ərazisində 7000 kv.m tamet örtüyü dəyişdirilmişdir. İl ərzində ekoloji layihələrin icrasına 165 000 manat yönəldilmişdir. Şəhər ərazilərində 23000-ə yaxın  ağac sərv,aleandra,zeytun və 10 000  yaxın mövsümi güllər əkilmişdir. Bələdiyyə Parkında abadlıq və sosial mühitin yaxşılaşdırılması məqsədilə ictimai məkanların daha funksional və əhalinin müxtəlif yaş qrupları üçün əlçatan olması məqsədilə abadlıq işləri həyata keçirilmişdir. Bələdiyyə parkı Sumqayıt şəhər İcra Hakimiyyətinin başçısı cənab Zakir Fərəcovun ilk dəfə 2000-ci ildə bələdiyyə sədri seçildiyi dövrdə,bir ay yaxın qısa müddət ərzində formalaşdırılmış parkdır. Həmin parkın yaradılması şəhər ərazisində ictimai məkanların təşkili və əhalinin asudə vaxtının səmərəli keçirilməsi baxımından mühüm əhəmiyyət daşımışdır.Qeyd etmək yerinə düşər ki, Azərbaycan Respublikası Nazirlər Kabinetinin 8 iyul 2002-ci il tarixli 106 nömrəli “Bələdiyyə mülkiyyətinə verilən dövlət əmlakının Siyahısının təsdiq edilməsi barədə” Qərarına əsasən sözügedən “Şəhər bağı” Sumqayıt  Bələdiyyəsinin mülkiyyətinə aid edilmişdir. Lakin 2019-cu ildə yeni xəritələrin təsdiqi zamanı həmin ərazi əvvəlki hüquqi statusu nəzərə alınmadan dövlət əmlakı kimi rəsmiləşdirilmişdir.Bununla əlaqədar olaraq Sumqayıt Bələdiyyəsi tərəfindən rəsmi müraciət edilmiş,İqtisadiyyat Nazirliyi yanında Əmlak Məsələləri üzrə Dövlət Xidmətinə təqdim olunan müraciət və Nazirlər Kabinetinin qeyd olunan qərarı əsasında sözügedən ərazinin yenidən Sumqayıt Bələdiyyəsinin mülkiyyətinə verilməsi istiqamətində hüquqi prosedurlara başlanılmışdır.Hazırda bu istiqamətdə müvafiq işlər davam etdirilir və proses yekunlaşmaq ərəfəsindədir.Parkımızda eyni zamanda əhalinin müxtəlif yaş qrupları abadlıq və sosial infrastrukturun yaradılması istiqamətində tədbirlər həyata keçirilmişdir.Körpə fidanlarımız üçün yelləncəklər,oyun atraksionları quraşdırılmış,digər nəslin – xüsusilə də ağsaqqalların açıq havada vaxtlarını rahat və səmərəli şəkildə keçirmələri üçün ayrıca istirahət sahələri yaradılmışdır.Əhalinin asudə vaxtının və ailəvi tədbirlərin ödənişsiz təşkili məqsədilə piknik üçün nəzərdə tutulmuş yerlər yaradılmış,bu sahələr zəruri avadanlıqla təmin olunaraq ictimai istifadəyə verilmişdir.Görülən işlər şəhər sakinlərinin sosial rifahının yaxşılaşdırılmasına və açıq məkanlardan istifadənin genişləndirilməsinə xidmət edir.

Ümumilikdə,yerli sosial inkişaf proqramının icrasına yerli büdcədən  1 200 000 manat vəsait xərclənmişdir.

Keçən il ölkəmiz üçün xüsusi əhəmiyyət daşıyan bir il olmuşdur.2025-ci il “Konstitusiya və Suverenlik İli” elan edilmiş, eyni zamanda Sumqayıt şəhəri Azərbaycan Respublikasının “2025-ci il üzrə Gənclər Paytaxtı” seçilmişdir. Bu iki mühüm status Sumqayıt şəhərində həyata keçirilən sosial layihələrin məzmununa, istiqamətlərinə və görülən işlərinə xüsusi məsuliyyət və strateji yanaşma qazandırmışdır. Bu istiqamət üzrə son bir il ərzində Sumqayıt şəhərində reallaşdırılan sosial layihələr insanı,ailəni və gəncliyi mərkəzə alan,konstitusion dəyərlərə və dövlət suverenliyinin möhkəmləndirilməsi ideyasına söykənən ardıcıl fəaliyyət xətti üzərində qurulmuşdur. Məqsədimiz yalnız ayrı-ayrı tədbirlərin təşkili deyildir, məqsədimiz Konstitusiyanın təmin etdiyi hüquq və azadlıqlara əsaslanan, cəmiyyətin real ehtiyaclarına cavab verən və uzunmüddətli sosial təsir yaradan təşəbbüslərin həyata keçirilməsi olmuşdur. Əsas diqqət uşaq və gənclərin hüquqlarının qorunması,gender bərabərliyinin təşviqi,məişət zorakılığına qarşı maarifləndirmə istiqamətlərinə yönəldilmişdir. Sumqayıt şəhərinin Gənclər Paytaxtı statusu çərçivəsində uşaq və gənclərlə bağlı Sağlam düşüncə Gənclər Təşkilatı,Abşeron-Xızı Regional Karyera Mərkəzi və Gənclər evi ilə birgə layihələr xüsusi intensivliklə həyata keçirilmişdir.

1 İyun – Uşaqların Beynəlxalq Müdafiəsi Günü münasibətilə keçirilən geniş ictimai tədbir bu fəaliyyətin mühüm tərkib hissəsi olmuşdur.Bu layihələrin əsas mesajı aydın idi:uşaqların və gənclərin rifahı dövlətin və cəmiyyətin gələcək inkişafının əsas təminatıdır. Gənclərin sağlam həyat tərzinə təşviqi məqsədilə velosiped yürüşləri,mini futbol yarışları  və kütləvi idman təşəbbüsləri həyata keçirilmişdir.Həyata keçirilən layihələr gənclərin asudə vaxtının səmərəli təşkili, fiziki və psixoloji sağlamlığın möhkəmləndirilməsi ilə yanaşı, sosial fəallığın artırılmasına xidmət etmişdir. “Konstitusiya və Suverenlik İli” çərçivəsində gender bərabərliyi və məişət zorakılığına qarşı mübarizə məsələləri əsas istiqamət kimi müəyyən edilmişdir.Bu sahədə dövlət qurumları,ictimai təşkilatlar və yerli icmaların iştirakı ilə maarifləndirici tədbirlər keçirilmiş,hüquqi mexanizmlər və erkən nikaha müdaxilə imkanları geniş şəkildə izah olunmuşdur.

Şəhid ailələri və qazilərlə bağlı həyata keçirilən fəaliyyətlər,milli-mənəvi dəyərlərin qorunması, Zəfər Gününə həsr olunmuş vətənpərvərlik və intellektual layihələr isə dövlət suverenliyinin cəmiyyətin mənəvi şüurunda möhkəmləndirilməsinə xidmət etmişdir. Ümumilikdə,2025-ci ildə Sumqayıt Bələdiyyəsi tərəfindən  icra olunan sosial layihələr - Konstitusiya dəyərlərinə əsaslanan,gənclərin potensialını ön plana çıxaran,dövlət siyasəti ilə uzlaşan və uzunmüddətli sosial təsir hədəfləyən təşəbbüslər olmuşdur.

Diqqətimiz bələdiyyədə çalışan əməkdaşların və vətəndaşların rahat fəaliyyət göstərməsi üçün inzibati və sosial şəraitin yaxşılaşdırılmasına yönəldilmişdir.

Ötən il ərzində Sumqayıt Bələdiyyəsinin fəaliyyətinin daha səmərəli təşkili,idarəetmə və nəzarət imkanlarının genişləndirilməsi,əməkdaşların iş şəraitinin yaxşılaşdırılması,eləcə də şəhər təsərrüfatı və ictimai məkanların funksionallığının artırılması məqsədilə əsas vəsaitlərin və inventarların alınması istiqamətində planlı və məqsədyönlü tədbirlər həyata keçirilmişdir.                               

Bu tədbirlər çərçivəsində informasiya-kommunikasiya texnologiyalarının tətbiqi genişləndirilmiş,inzibati binamızda  texniki təminat gücləndirilmiş,zəruri avadanlıq və inventarlarla təmin olunmuşdur.Bələdiyyənin elektron idarəetmə imkanlarının artırılması məqsədilə müasir tələblərə cavab verən  kompüter, noutbuk və monitorlar,printer və çoxfunksiyalı çap qurğuları, planşet,yaddaş daşıyıcıları,qrafik komputer dəstləri alınmışdır.Bu avadanlıqlar maliyyə uçotu,vergi inventarizasiyası, sənədləşmə və vətəndaş müraciətlərinin operativ icrası üçün istifadə olunur.İcra olunan işlərin operativliyinin və dəqiqliyinin artırılması,habelə nəzarət və ölçmə proseslərinin müasir texnoloji tələblərə uyğun təşkili məqsədilə real vaxt rejimində məlumatların ötürülməsini təmin edən,yeni texnologiyalara uyğun GPRS aparatı alınmışdır. Müşahidə və təhlükəsizlik kameraları, proyektorlar, kondisionerlər alınaraq müvafiq struktur bölmələr üzrə paylanmışdır.Sumqayıt Bələdiyyəsinə ofis mebelləri alınmış,köhnəlmiş inventarlar mərhələli şəkildə yenilənmişdir.Bələdiyyənin operativ fəaliyyətinin təmin edilməsi,sahə işlərinin çevik təşkili və vətəndaş müraciətlərinə yerində baxılmasının səmərəliliyinin artırılması məqsədilə maddi-texniki baza gücləndirilmiş və 3 ədəd yeni “Changan A05” sedan markalı minik avtomobilləri alınmışdır.                                                     

Vətəndaş müraciətlərinin mərkəzləşdirilmiş qaydada qəbulu və operativ icrasının təmin edilməsi üçün Rəqəmsal İnkişaf və Nəqliyyat Nazirliyinə edilmiş rəsmi müraciət əsasında 1923-4 rəqəmli çağrı mərkəzinin aktivləşdirilməsi  də həyata keçirilmişdir. Görülmüş bu tədbirlər nəticəsində Sumqayıt Bələdiyyəsinin maddi-texniki bazası əhəmiyyətli dərəcədə möhkəmləndirilmiş, idarəetmə və nəzarət imkanları genişləndirilmiş, əməkdaşların iş şəraiti yaxşılaşdırılmış,xidmətlərin operativliyi və keyfiyyəti artırılmışdır.

İl ərzində müntəzəm olaraq vətəndaş qəbulları keçirilmişdir.Ümumilikdə vətəndaş qəbullarımızda 400-dən çox şəhid ailələri,qazilər və sosial həssas təbəqəyə aid vətəndaşlar iştirak etmişdir.Vətəndaş müraciətləri yerində dinlənilmiş,diqqət mərkəzində saxlanılmış, və mümkün həll mexanizmləri üzrə konkret addımlar atılmışdır.

Əldə olunan nəticələr ilk növbədə Sumqayıt Bələdiyyəsinin təşəbbüsü,koordinasiyası və sistemli fəaliyyəti nəticəsində mümkün olmuşdur.Bələdiyyə öz səlahiyyətləri çərçivəsində şəhər ərazisində fəaliyyət göstərən idarə və qurumlarla məqsədyönlü əməkdaşlıq mexanizmləri qurmuşdur.

Bu əməkdaşlığın ən bariz nümunələrindən biri də Sumqayıt Şəhər İcra Hakimiyyəti ilə qarşılıqlı fəaliyyət olmuşdur.Əməkdaşlıq prosesində şəhər ərazisində abadlıq və infrastruktur layihələrinin icrası, mühəndis-kommunikasiya xətlərinin qorunması, küçə və məhəllələrdə aparılan işlərin mərhələli şəkildə əlaqələndirilməsi təmin edilmişdir. Şəhər təsərrüfatı sektorunda fəaliyyət göstərən müvafiq qurumlarla da sıx əməkdaşlıq qurulmuşdur. Azərişıq Açıq Səhmdar Cəmiyyəti,İri şəhərlərin Birləşmiş Su Təchizatı Xidməti,Azəriqaz İstehsalat Birliyi və Sumqayıt Bulvarı MMC ilə koordinasiyalı şəkildə işlər aparılmışdır.Bələdiyyə mülkiyyətinə daxil olan yaşıllıq sahələrinin qorunması və genişləndirilməsi,ərazilərin gündəlik təmizliyi və sanitariya vəziyyətinin təmin edilməsi məqsədilə Sumqayıt şəhər Yaşıllaşdırma İdarəsi və Təmizlik Departamenti ilə sıx əməkdaşlıq edilmişdir.Ötən il ərzində Mənzil Kommunal Təsərrüfatı İstehsalat Birliyinin xidmət dairəsinə daxil olmayan ərazilərdə yəni 20-21-ci mik, 50-51-52-ci məhəllələrdə,Kotec qəsəbəsində,Novxanı,Qurd dərəsi,Xəzər bağları, Kimyaçılar qəsəbəsində də təmizlik və abadlıq işlərinin aparılmasının təmin edilməsi məqsədilə aidiyyatı qurumun təmizlik üzrə əməkdaşları ilə birgə iməcliklər təşkil olunmuş,məişət tullantılarının vaxtında yığışdırılması və ümumi abadlıq səviyyəsinin saxlanılması təmin edilmişdir.

Sumqayıt Şəhər İcra Hakimiyyəti ilə birgə aparılan koordinasiyalı fəaliyyətin tərkib hissəsi olaraq, şəhər ərazisində torpaq münasibətlərinin tənzimlənməsi, mülkiyyət hüquqlarının dəqiqləşdirilməsi və qanunsuz istifadə hallarının aradan qaldırılması məqsədilə komissiyalar yaradılmışdır. Bu komissiyanın fəaliyyəti nəticəsində hüquqi sənədi olmadan istifadəsində artıq torpaq sahələri olan vətəndaşlar müəyyən edilmiş,həmin şəxslər qanunvericiliyin tələblərinə uyğun şəkildə sənədləşməyə cəlb olunmuşdur. Sənədləşmədən yayınan vətəndaşlar üzrə toplanmış materiallar qanuni prosedurlara uyğun olaraq icra mexanizmlərinə və zəruri hallarda isə hüquq-mühafizə orqanlarına təqdim edilmişdir. Hal-hazıki vəziyyətə qədər 16 zəbtolunma üzrə sənəd şəhər prokurorluğuna və polis idarəsinə  göndərilmiş,             7 nəfərə qarşı artıq cinayət iş başlanılmışdır.Digər bir tərəfdən bələdiyyə ödənişlərindən yayınma halları ilə bağlı qəbul edilmiş qərarlar və həmin qərarlara əsasən hazırlanmış rəsmi məktublar müvafiq icra idarəsinə yönəldilmişdir.İcra idarəsi tərəfindən daxil olmuş müraciətlərə qanunvericiliyin tələblərinə uyğun şəkildə baxılmış, mövcud icra mexanizmləri tətbiq edilmiş və nəticədə vergi öhdəliklərinin məcburi qaydada yerinə yetirilməsi təmin olunmuşdur. Görülmüş tədbirlər bələdiyyə qərarlarının icraedici xarakterini,eləcə də bələdiyyə ilə icra idarəsi arasında formalaşmış sıx işgüzar əməkdaşlığın səmərəliliyini açıq şəkildə ortaya qoymuşdur.

Sumqayıt Regional Ədliyyə İdarəsi ilə əməkdaşlıq çərçivəsində isə bələdiyyənin fəaliyyətində hüquqi prosedurların şəffaf aparılması və normativ tələblərə riayət olunması baxımından mühüm addımlar atılmışdır. Bu əməkdaşlıq bələdiyyənin torpaq və əmlak münasibətlərinin hüquqi tənzimlənməsində,mülkiyyət hüquqlarının qanunvericiliyə uyğun rəsmiləşdirilməsində və mövcud hüquqi boşluqların aradan qaldırılmasında xüsusi rol oynamışdır. Əməkdaşlıq çərçivəsində torpaq və əmlak münasibətləri sahəsində yaranan mübahisəli məsələlər hüquqi müstəvidə araşdırılmış, müvafiq normativ-hüquqi aktlara əsaslanaraq qərarların qəbul olunması təmin edilmişdir.

Hüquqi əsaslar üzərində dayanaraq,icra mərhələsinə keçid məhz 2025-ci ildə real və ölçülə bilən nəticələrlə müşayiət olunmuşdur. Əgər əvvəlki dövrlərdə bu istiqamətdə əsasən normativ və planlaşdırma mərhələsi həyata keçirilirdisə,ötən il Sumqayıt Bələdiyyəsi üçün faktiki icra ili olmuşdur.Məhz 2025-ci ildə Sumqayıt şəhərinin inzibati ərazisinin genişləndirilməsi ilə bağlı ən mühüm praktiki addımlar atılmışdır. Bakı şəhəri Binəqədi rayonunun,Sumqayıt şəhərinin və Abşeron rayonunun sərhədlərinin müəyyənləşdirilməsi haqqında” 2023-cü il 17 oktyabr tarixli Azərbaycan Respublikası Prezidentinin Sərəncamı” na əsasən Sumqayıt şəhərinin inzibati ərazisinin genişləndirilməsi məqsədilə Sarıqaya  ərazisi üzrə 1588 hektar, Yaşma bağlar massivi üzrə 2223.67 ha üzrə ümumilikdə 3811.67 hektara yaxın torpaq sahəsinin Sumqayıt şəhərinin balansına verilməsi torpaq və əmlak münasibətlərinin hüquqi tənzimlənməsi baxımından mühüm mərhələ olmuşdur. Sözügedən Sərəncam bu ərazilərdə uzun illər mövcud olan hüquqi qeyri-müəyyənliyin aradan qaldırılmasına və sistemli sənədləşmə prosesinin başlanılmasına real hüquqi zəmin yaratmışdır. Fərman və tapşırıqların icrası, eləcə də aparılmış sayım və inventarizasiya nəticəsində torpaq və əmlak münasibətlərinin hüquqi müstəvidə tənzimlənməsi üçün zəruri şərait yaradılmışdır.Aydın şəkildə qeyd olunmalıdır ki, bu prosesin icrası 5 avqust 2025-ci il tarixində Sumqayıt Bələdiyyəsi ilə  “Kadastr və Yerquruluşu Layihə-Tədqiqat Mərkəzi” MMC ilə müqavilə bağlanmışdır. Sözügedən müqavilə Sumqayıt şəhərinin adıçəkilən ərazilərində daşınmaz əmlakların elektron kadastr uçotunun aparılmasını nəzərdə tutmuşdur. Bu prosesdə cənab Zakir Fərəcovun ardıcıl mövqeyi, prinsipial yanaşması, təşəbbüskarlığı və əvəzolunmaz dəstəyi həlledici rol oynamışdır. Məhz bu siyasi və inzibati iradənin nəticəsi olaraq illərdir hüquqi statusu qeyri-müəyyən qalan torpaq sahələrinin dürüstləşdirilməsi hal-hazırdada aparılır.

 Qeyd olunan müqavilənin icrası çərçivəsində 2025-ci il avqustun 12-dən etibarən İqtisadiyyat Nazirliyi yanında Əmlak Məsələləri üzrə Dövlət Xidməti ilə birgə bələdiyyə əməkdaşlarının iştirakı ilə yaradılmış müvəqqəti komissiyalar sahə üzrə ölçmə və kadastr işlərinə başlanılmışdır. İşlər normativ tələblərə uyğun, mərhələli və sistemli şəkildə aparılmışdır.

Xüsusilə vurğulanmalıdır ki, Novxanı, Sarıqaya və Corat bağları üzrə uzun illər yerində ölçmə aparılmayan, sənədləşmə baxımından boşluqlar mövcud olan ərazilərdə faktiki vəziyyət dəqiqləşdirilmiş,torpaq sahələrinin sərhədləri yerində müəyyən edilmiş və ölçmə işləri yekunlaşdırılmışdır. Hazırda bu proses kameral mərhələdə davam etdirilir, paralel olaraq Yaşma bağları ərazisində də işlər mərhələli şəkildə icra olunur.

Bu gün keçirilən tədbirdə Sumqayıt şəhərini Milli Məclisdə təmsil edən millət vəkillərimizin iştirak etməsi bizim üçün xüsusi bir əhəmiyyət kəsb edir. Fürsətdən istifadə edərək, hər birinizə  tədbirimizdə iştirak etdiyinizə görə  səmimi təşəkkürümüzü bildiririk. Məlumat üçün bildirirəm ki, hazırkı mərhələdə millət vəkilimiz xanım  Mehriban Vəliyeva ilə birgə nəticəyönümlü əməkdaşlıq həyata keçirilmiş və  Yaşıldərə yaşayış massivində vətəndaş qəbulu keçirilmişdir. Qəbul zamanı sakinlərin müraciətləri yerində dinlənilmiş,mövcud sosial, infrastruktur və məişət problemləri birbaşa və açıq müzakirə olunmuşdur. Bələdiyyənin səlahiyyət və imkanları daxilində olan məsələlər üzrə qərarlar qəbul edilmiş, həlli dərhal mümkün olmayan problemlər isə qeydiyyata alınaraq aidiyyəti qurumlarla birgə qarşıdakı dövrdə mərhələli şəkildə həll olunması məqsədilə nəzarətə götürülmüşdür. Yaşıl Dərə ərazisinin kontingent baxımından mürəkkəbliyi, əhali axının yüksək olması, məskunlaşma hallarının geniş yayıldığı ərazi olduğu üçün bu yaşayış massivinə Sumqayıt şəhər İcra Hakimiyyətinin, millət vəkillərimizin və Sumqayıt Bələdiyyəsinin yanaşması hər zaman humanist və sosial məsuliyyət prinsiplərinə əsaslanmışdır. Sumqayıt şəhərini özləri üçün bir sığınacaq, təhlükəsiz və doğma məkan kimi qəbul etdiklərinə görə bu vətəndaşlarımızın problemlərinə hər zaman anlayış və həssaslıqla yanaşılmışdır.

Böyük fərəh hissi ilə qeyd etmək istərdim ki, 2025-ci ildə Sumqayıt Bələdiyyəsi Respublika üzrə fəaliyyət göstərən 74 şəhər bələdiyyəsi arasında  görülən işlərin səmərələliyinə, əzmkar və nəticəyönümlü fəaliyyətinə görə BİRİNCİ SIRADA qərarlaşmışdır.

Bu uğur yalnız bir qurumun deyildir. Əldə olunan uğur bütün aidiyyəti strukturların, rəhbərliyin və şəhərə ürəkdən bağlı olan insanların birgə fəaliyyətinin uğurudur.

Bizim nəticəyönümlü fəaliyyətimizdə  şəhərdə fəaliyyət göstərən nümunəvi vergi ödəyiciləri olan sahibkarlarımızın da rolu danılmazdır. Onlar məsuliyyətli və vətəndaş mövqeyi nümayiş etdirərək, ödənişlərini vaxtında və tam şəkildə həyata keçirmişlər. Sahibkarlar faktiki olaraq Sumqayıt Bələdiyyəsinin tərəfdaşı kimi çıxış etmiş, şəhərin abadlaşdırılması, sosial layihələrin icrası və ictimai infrastrukturun inkişafında dolayı, lakin əhəmiyyətli rol oynamışlar. Belə nümunəvi vergi ödəyicilərinin mövcudluğu Sumqayıt Bələdiyyəsinin fəaliyyətini gücləndirən əsas dayaqlardan biridir və bu yanaşma şəhər-bələdiyyə-sahibkar əməkdaşlığının düzgün qurulduğunu açıq şəkildə göstərir. Tədbirimizdə iştirak edən hər bir sahibkarımıza il ərzində bələdiyyəyə göstərdiyiniz məsuliyyətli və nümunəvi mövqeyinizə görə ayrı-ayrılıqda təşəkkürümüzü bildiririk.

Sumqayıt Bələdiyyəsinin bu uğurlu nəticəni əldə etməsinin arxasında çox gözəl, peşəkar və bir-birini tamamlayan bir vahid kollektiv dayanır. Əldə olunan birincilik göstərir ki, Sumqayıt Bələdiyyəsində peşəkar və gənclərdən ibarət  işçi heyəti var və bu heyətimiz qarşıdakı illərdə də şəhərin inkişafı üçün daha böyük işlər görməyə qadirdir.

Bu uğurlu nəticəni əldə etməsinin arxasında peşəkar icra strukturları ilə yanaşı,eyni zamanda bələdiyyə üzvlərinin də fəal mövqeyi, məsuliyyətli yanaşması və birgə əməkdaşlığı dayanır. Bələdiyyə üzvləri şəhərin inkişafı ilə bağlı qərarların qəbulunda,sosial layihələrin irəli sürülməsində və icrasında yaxından iştirak edərək bu nəticələrin formalaşmasına mühüm töhfə vermişlər.

Sumqayıt Bələdiyyəsinin bu hesabat təkcə görülən işlərin sadalanması deyil. Biz hesab edirik ki, hesabatlılıq yalnız uğurları deyil, həm də reallığı da olduğu kimi deməyi tələb edir.

Cari ildə Sumqayıt şəhər İcra Hakimiyyətinin, kollektivin və  seçicilərimizin birgə səyi ilə  daha böyük uğurlara imza atmaq niyyətindəyik.

Adil Xudadatov

Sumqayıt Bələdiyyəsinin sədri