Sumqayıt Bələdiyyəsi və Sumqayıt Regional Ədliyyə İdarəsinin birgə təşkilatçılığı ilə, Yeni Azərbaycan Partiyasının inzibati binasında Azərbaycan Respublikası Ədliyyə Nazirliyinin Bələdiyyələrlə İş Baş İdarəsinin metodiki tövsiyələri əsasında seminar təşkil olundu.

Seminar üç əsas istiqamət üzrə müzakirə edildi:

- 2026-cı ilin “Şəhərsalma və Memarlıq İli” çərçivəsində qarşıda duran vəzifələr

- Bələdiyyə üzvləri və qulluqçularının hüquqi statusu və məsuliyyəti

- “Qiymətləndirmə fəaliyyəti haqqında” Qanunun tətbiqi zamanı yaranan praktiki məsələlər

Seminarı açan Sumqayıt Bələdiyyəsinin sədri Adil Xudadatov çıxışında Azərbaycan Respublikasının Prezidentinin 2025-ci ildə yerli özünüidarə və şəhərsalma sahəsində müəyyən etdiyi strateji çağırışlara toxunaraq bildirdi ki, “Şəhərsalma və Memarlıq İli” çərçivəsində 2026-cı il üzrə əsas istiqamət kimi Yaşıl Dərə yaşayış massivi müəyyən edilmişdir. Həmin ərazidə asfaltlanması nəzərdə tutulan küçələrin yenilənməsi, kompleks abadlıq işlərinin aparılması və müasir küçə işıqlandırma sistemlərinin qurulması planlaşdırılır. Görüləcək işlər şəhərsalma normalarına və təhlükəsizlik tələblərinə uyğun şəkildə həyata keçiriləcəkdir.

Çıxış zamanı bələdiyyə üzvləri və qulluqçularının hüquqi statusu və məsuliyyəti xüsusi vurğulanaraq qeyd edildi ki, qərarların qəbulu prosesində qanunvericiliyin düzgün tətbiqi, şəffaflıq və hüquqi əsaslandırma əsas prinsip kimi qəbul olunmalıdır.

Qiymətləndirmə və torpaq sənədləşdirilməsi sahəsində mövcud vəziyyətə xüsusi diqqət yetirildi. Qeyd olundu ki, Sumqayıt şəhəri üzrə bələdiyyənin ehtiyat fondunda istifadəyə verilə biləcək boş torpaq sahəsi mövcud deyil. Sənədləşmə prosesinə cəlb olunan torpaq sahələri əsasən uzun illərdir əhalinin faktiki istifadəsində olan, üzərində yaşayış evləri inşa edilmiş və abadlaşdırılmış ərazilərdir. Bu reallıq nəzərə alınmadan tətbiq edilən mexaniki yanaşmalar və imtina qərarları birbaşa Sumqayıt sakinlərinin sosial problemlərinə çevrilir. Vurğulandı ki, bu məsələ artıq inzibati prosedur çərçivəsindən çıxaraq şəhər sakinlərinin gündəlik həyatına təsir edən ciddi sosial məsələdir. Məhz bu səbəbdən problem Sumqayıt Şəhər İcra Hakimiyyətinin başçısı cənab Zakir Fərəcovun nəzarətindədir və məsələnin sistemli həlli istiqamətində koordinasiyalı yanaşma vacib hesab olunur.Eyni zamanda “Qiymətləndirmə fəaliyyəti haqqında” Qanunun tətbiqi zamanı yaranan praktiki çətinliklərə toxunuldu, torpaq və əmlakın sənədləşdirilməsi prosesində normativ tələblərlə real vəziyyət arasında uzlaşmanın təmin edilməsinin vacibliyi bildirildi.

Tədbirdə Sumqayıt Regional Ədliyyə İdarəsinin rəis vəzifəsini icra edən Hüseyn Məmmədov, aparıcı məsləhətçi Rüfanə Ömərova, Sumqayıt Regional İcra İdarəsinin müdir müavini Bayram Bayramzadə və Sumqayıt Regional Vəkillər Bürosunun müdiri Anar Qasımlı çıxış edərək mövzular üzrə fikir və təkliflərini bölüşdülər.

Seminar çərçivəsində Sumqayıt Bələdiyyəsi ilə Sumqayıt Regional Vəkillər Bürosu arasında əməkdaşlıq memorandumu imzalandı. Memorandumun əsas məqsədi bələdiyyəyə müraciət edən aztəminatlı və həssas kateqoriyaya aid ailələrə pulsuz hüquqi yardımın göstərilməsi, müraciətlərin hüquqi baxımdan düzgün istiqamətləndirilməsi və vətəndaşların qanuni maraqlarının müdafiəsinin gücləndirilməsidir.

Seminar qarşılıqlı fikir mübadiləsi şəraitində keçirildi və normativ baza ilə real icra təcrübəsi arasında uzlaşmanın təmin olunmasına xidmət etdi. Şəffaflıq, hüquqi məsuliyyət və əməkdaşlıq yerli özünüidarənin dayanıqlı inkişafının əsas təminatıdır.