(Yanvar–İyun 2025)

1. Giriş

Şabran Bələdiyyəsi 2025-ci ilin ilk yarısında yerli özünüidarəetmənin inkişafı, əhalinin sosial rifahının yüksəldilməsi, infrastrukturun yenilənməsi və ictimai iştiraka əsaslanan idarəetmənin təşviqi istiqamətində ardıcıl və məqsədyönlü fəaliyyət həyata keçirmişdir. Hesabat dövrü ərzində sosial yönümlü layihələrə, şəffaf idarəetməyə, gənclərin və həssas əhali təbəqələrinin dəstəyinə xüsusi önəm verilmişdir.

2. Bələdiyyə Komissiyalarının Fəaliyyəti

Bələdiyyə nəzdində fəaliyyət göstərən komissiyalar bu dövrdə öz işini səmərəli şəkildə təşkil etmişdir:

  Gender bərabərliyi komissiyası qadınların ictimai fəallığının artırılması və hüquqi maarifləndirmə sahəsində təşəbbüslər irəli sürmüşdür.

   Təhsil, idman və mədəniyyət komissiyası məktəblilərin və müəllimlərin təltif olunması, gənclərin idman tədbirlərinə dəstəklənməsi və yerli mədəni dəyərlərin qorunması istiqamətində fəal olmuşdur.

   Maliyyə və hesabatlılıq komissiyası bələdiyyə qərarlarının şəffaf və əsaslı icrasına nəzarət etmişdir.

3. Sosial və Humanitar Fəaliyyət

   Uşaq günü münasibətilə Siyəzən şəhər İnteqrasiya tipli internat evi və Quba rayon Zərdabi kəndində yerləşən internata yardım göstərilmiş, uşaqlara dəstək verilməsi təmin olunmuşdur.

Şəhid və qazi ailələri ilə mütəmadi görüşlər keçirilmiş, onların sosial ehtiyaclarına xüsusi diqqət yetirilmişdir.

Rayonun yaşlı sakinləri evlərində ziyarət edilmiş, onların vəziyyəti öyrənilmiş və mənəvi dayaq olunmuşdur.

Bayram günlərində – Qurban və Ramazan bayramları zamanı aztəminatlı ailələrə yardım paylanmış, sosial bərabərlik dəstəklənmişdir.

Maddi yardıma ehtiyacı olan ailələrə fərdi maddi yardım göstərilmişdir.

Vətəndaşların gündəlik müraciətlərinin operativ həlli təmin olunmuş, problemlər yerində araşdırılaraq müvafiq tədbirlər görülmüşdür.

4. Təhsil və Gənclərin Dəstəklənməsi

RFM və RFO kimi respublika miqyaslı fənn yarışlarında yüksək nəticə göstərən şagirdlərlə görüş keçirilmiş, onların uğurları təqdir olunmuşdur.

Sertifikasiya imtahanlarında uğur qazanan müəllimlərlə görüşlər təşkil olunmuş, onlara təşəkkür və motivasiya verilmişdir.

Rayonumuzu təmsil edən tennis komandası ölkə birinciliyində iştirak üçün Bakıya ezam olunmuş, yol xərcləri bələdiyyə tərəfindən ödənilmişdir.

Bələdiyyədə ali məktəb tələbələrinin təcrübə keçməsi üçün yüksək şərait yaradılmış, gənclərin idarəetmə prosesinə adaptasiyası dəstəklənmişdir.

5. İnfrastruktur və Abadlıq

Cəlil Məmmədquluzadə küçəsində abadlıq işləri aparılmışdır.

Ləcədi kənd yolunun təmiri icra olunmuşdur.

5 sot və 3 sot yaşayış massivlərində əsaslı yol və abadlıq işləri görülmüşdür.

Kənd adlarını əks etdirən lövhələr hazırlanaraq müvafiq kənd girişlərinə yerləşdirilmişdir.

Hacıqaraqaşlı kəndində və rayonun Rəşid Behbudov küçəsində baş vermiş selin fəsadlarının aradan qaldırılması məqsədilə təcili işlər görülmüşdür.

6. Hüquqi İşlər və Torpaq Nəzarəti

Zəbt olunmuş torpaq sahələri ilə bağlı monitorinqlər aparılmış, qanunvericiliyə zidd halların qarşısının alınması istiqamətində tədbirlər görülmüşdür.

Məhkəmə prosesi çərçivəsində mülkiyyət hüququ pozulan torpaq sahələrinin geri qaytarılması istiqamətində hüquqi işlər davam etdirilmişdir.

7. İctimai Əlaqələr və İştirakçılıq

Rayon səviyyəli tədbirlərdə bələdiyyənin aktiv iştirakı təmin olunmuş, təmsilçilik və ictimai mövqenin gücləndirilməsi məqsədi daşıyan çıxışlar, təqdimatlar edilmişdir.

Bələdiyyə üzvləri ilə mütəmadi iclaslar və görüşlər keçirilmiş, qərarların qəbulunda kollektiv iştirak və hesabatlılıq prinsipləri tətbiq edilmişdir.

Sosial media üzərindən əhaliyə bələdiyyə fəaliyyəti barədə davamlı məlumatlar paylaşılmış, ictimaiyyətlə əlaqə gücləndirilmişdir.

8. Yekun və Gələcək Planlar

Şabran Bələdiyyəsi hesabat dövrü ərzində vətəndaşlara xidmət və ictimai maraqların qorunması istiqamətində prinsipial mövqe nümayiş etdirmişdir. Gələcək dövrdə kəndlərarası yolların daha da yaxşılaşdırılması, ictimai məkanların abadlaşdırılması və ekoloji təşəbbüslərin həyata keçirilməsi planlaşdırılır.

Şabran bələdiyyəsi