29 yanvar 2025-ci il tarixində keçirilən bələdiyyə seçkilərində YAP-ın Qaraçuxur bələdiyyəsi üzvlüyünə seçilən İxtiyar Nəcəfov başda olmaqla YAP-ın digər namizədləri seçicilərə təşəkkür ediblər. Müraciətdə deyilir: 

“Əziz Qaraçuxur və Yeni Günəşli sakinləri, dəyərli seçicilər!

Bildiyiniz kimi, 29 yanvar 2025-ci il tarixində ölkəmizdə növbəti bələdiyyə seçkiləri keçirildi. Demokratik və şəffaf mühitdə keçirilən seçkilərdə Yeni Azərbaycan Partiyasının (YAP) Qaraçuxur bələdiyyəsi üzvlüyünə namizədi kimi 13425 səslə lider namizəd oldum və sizlər partiyamızın Qaraçuxur bələdiyyəsi üzvlüyünə daha 11 namizədə etimad göstərdiniz. İlk olaraq bizə etimad göstərib namizədliyimizi dəstəklədiyi üçün partiyamızın sədri, Cənab Prezident, Müzəffər Ali Baş Komandan İlham Əliyevə sonsuz təşəkkürümü bildiririk. Bu, Cənab Prezident İlham Əliyevin uzaqgörən və düşünülmüş siyasətinin növbəti möhtəşəm qələbəsi idi. YAP qələbələr partiyasıdır. Seçkinin təşviqat mərhələsi dövründə Qaraçuxur və Yeni Günəşlidə onlarla səyyar görüş keçirdik. Bu görüşlərdə bizi tək qoymadığınız, seçkidə bizə səs verdiyiniz üçün sizlərə təşəkkür edirəm. Seçkinin ilkin nəticələri elan olunduqdan dərhal sonra minlərlə təbrik məktubu aldıq. Bu bizi həm sevindirdi, həm də gələcək fəaliyyətimiz üçün məsuliyyətimizi daha da artırdı. Təbrik məktublarınıza tək-tək cavab verə bilmədiyimiz üçün sizlərdən üzr istəyirik”. İxtiyar Nəcəfov bildirib ki, təşviqat mərhələsi dövründə daim yanlarında olub bizə dəstəyini bildirən bəzi dəyərli insanlara xüsusi minnətdarlığımız var: “Azərbaycanın ən gənc şəhid milli qəhrəmanı Cavanşir Rəhimovun anası Lalə Rəhimovaya, Suraxanı rayon Ağsaqqallar Şurasının sədr müavini, şəhid baş leytenant Muxtar Qasımlının atası Əli Qasımova, şəhidimizin anası Almaz Qasımovaya, şəhid Orxan Qəhrəmanovun anası Arzu Qəhrəmanovaya, şəhid Şahmar Səfətovun anası Pakizər Səfərovaya, şəhid İsabala Hüseynovun atası Ceyhun Hüseynova, şəhid Mürsəl Kazımlının atası Kamil Kazımova, dəyərli qazilərimiz-baş leytenant Rafiq Rəhimliyə, İsmayıl Quliyevə, Sənan Yolçuyevə, Əbülfət Qurbanova, “Dövlətə Dəstək” Qazilər İctimai Birliyinin sədri Rəhman Muradova, 44 günlük Vətən müharibəsinin iştirakçısı, ictimai fəal Pərvin Mahmudova, rayonumuzun ziyalılarına, xüsusi olaraq Vaqif Rüstəmova, Bəxtiyar Nəcəfova, Qərbi Azərbaycan İcmasının Suraxanı rayon nümayəndəliyinin üzvlərinə, Qaraçuxur, Yeni Günəşlinin ağsaqqallarına, gənclərinə və bu işdə zəhməti keçən adını unutduğum hər kəsə öz dərin minnətdarlığımızı bildiririk. Bələdiyyə seçkilərində müşahidə olunan aktivlik, şəffaflıq və demokratik mühit Azərbaycanın seçki sistemində qazandığı zəngin təcrübəni bir daha sübuta yetirmiş oldu. Əziz seçicilər, sizin bizə göstərdiyiniz yüksək etimadı doğruldacağımıza, Qaraçuxur bələdiyyəsinin fəaliyyətini müasir tələblər və qanunvericilik səviyyəsində quracağımıza söz veririk. Daha güclü Azərbaycan üçün hər birimiz Cənab Prezident İlham Əliyevin ətrafında sıx birləşməli və qazandığımız parlaq qələbələri ard-arda sıralamalıyıq”.