“Hər bir bələdiyyənin fəaliyyəti onun büdcədaxilolmalarından çox asılıdır. Bu gəlirlərin artması isə bələdiyyənin vergi-uçot sisteminin mövcud vəziyyəti ilə bağlıdır. Əgər bələdiyyə  vergi-uçot sistemini düzgün səmtdə qura bilibsə, demək gəlirlərin artma ehtimalı yüksəlir, nəticədə seçicinin qaldırdığı problemin də həlli sürətlənir”- bu fikirləri Belediyye.infoya Səbail bələdiyyəsinin sədri Hacı Əliyev deyib.

Sədrin sözlərinə görə, fəaliyyətimizlə nümunəvi bələdiyyələr sırasında  olmaq üçün bələdiyyə kollektivi var qüvvəsi ilə çalışır. Məhz bu fəaliyyətin nəticəsidir ki,  son illərdə Səbail bələdiyyəsi  üzrə vergi və digər yığımlar üzrə müsbət artım  dinamikası müşahidə olunur.

Son bir neçə ilin birinci rübünə aid əldə olunan büdcə gəlirlərinə toxunan sədr  2023–2026-cı illərin I rübü üzrə bələdiyyə yığımları illər üzrə artım müşahidə edilib. Belə ki, 2024-cü ildə yığımlar 2023-cü illə müqayisədə 66 759 manat artaraq ümumi olaraq  32 % yüksəlmişdir. Yəni 2023-cü ilin birinci rübündə  208.900  manat büdcə gəliri 2024-cü ildə  275.659 manatadək artıb.  2025-ci ildə artım tempi davam edərək əvvəlki illə müqayisədə 89.925 manat və ya 32,62% təşkil etmişdir. Yəni büdcə gəliri 275.659 manatdan 365.585 manatadək yüksəlib. 2026-cı ildə isə artım dinamikası sabitləşərək 2025-ci illə müqayisədə 1 999 manat və ya 0,55% artım qeydə alınmışdır. Belə ki, əvvəlki ildə 365.585 manat olduğu halda cari ildə bu rəqəm  367.584 manat olub. Büdcə daxilolmalarının təhlili göstərir ki, son üç ildə bələdiyyənin ümumi  büdcə gəlirlərində  75 faizədək artım olub.  

Hacı Əliyev qeyd edib ki, hesabat dövründə daxilolmaların strukturuna baxdıqda əsas payın əmlak vergisindən daxil olduğu  görünür. Belə ki, əmlak vergisi üzrə daxilolmalar 2024-cü ilin I rübündə 84.848 manat, 2025-ci ilin I rübündə 171.570 manat və 2026-cı ilin I rübündə 182.657 manat təşkil etmişdir.  Bu isə son üç ildə əmlak vergisinin yığımında 116 faizlik artım olub.   Torpaq vergisi üzrə daxilolmalar isə 2024-cü ilin I rübündə 5.450 manat, 2025-ci ilin I rübündə 7.866 manat və 2026-cı ilin I rübündə 5.492 manat olmuşdur.

Bələdiyyə mülkiyyətinin icarəsindən daxilolmalar 2024-cü ilin I rübündə 3.000 manat təşkil etmiş olsa da, 2025-ci ilin I rübündə və 2026-cı ilin I rübündə isə bu istiqamət üzrə daxilolma qeydə alınmamışdır.

Mehmanxana, sanatoriya-kurort və turizm xidmətləri göstərən şəxslərdən alınan ödənişlər 2024-cü ilin I rübündə 164.637 manat, 2025-ci ilin I rübündə 169.486 manat və 2026-cı ilin I rübündə 159.688  manat olmuşdur.

Nəqliyyat vasitələrinin dayanacaqları üçün daxilolmalar 2024-cü ilin I rübündə 17.396 manat, 2025-ci ilin I rübündə 16.662 manat və 2026-cı ilin I rübündə 18.141 manat təşkil etmişdir.

Küçə (divar) reklamlarının yayımı üzrə daxilolmalar 2024-cü ilin I rübündə 327 manat, 2025-ci ilin I rübündə daxilolma qeydə alınmamış, 2026-cı ilin I rübündə isə 1.605 manat olmuşdur.

Ümumilikdə, hesabat dövründə bələdiyyə yığımlarında nəzərəçarpacaq artım müşahidə olunub.

Bələdiyyə sədri bildirib ki, vergi yığımlarının artırılması istiqamətində görülən işlər daha sistemli şəkildə təşkil olunmuşdur. Bu çərçivədə mövcud rəqəmsal imkanlardan, xüsusilə Bələdiyyələrin Avtomatlaşdırılmış Məlumat Sisteminin (BAMS) imkanlarından fəal istifadə edilir, eyni zamanda elektron icra mexanizmlərinin tətbiqi yığımların səmərəliliyini artıraraq büdcə daxilolmalarına müsbət təsir göstərir.

Belediyye.info