Bu günlərdə Azərbaycan Prezidenti bələdiyyələrə aid bəzi qanunvericilik aktlarına edilən dəyişikliklərin icrası ilə bağlı imzaladığı Fərmandan irəli gələn bəzi məsələlərin həlli birbaşa  Bələdiyyələrin milli assosiasiyalarına tövsiyə olunub.

Bu tövsiyələr isə “Bələdiyyələrin vahid informasiya sisteminin” yaradılması ilə bağlıdır.

 Belə ki, “Bələdiyyələrin statusu haqqında qanuna edilən əlavəyə görə, “Yerli büdcələrin gəlirlərinin və xərclərinin uçotunun çevik və effektiv təşkili, vahid və aktual informasiya bazasının yaradılması məqsədilə “Bələdiyyələrin birgə fəaliyyəti, birləşməsi, ayrılması və ləğv edilməsi haqqında” Azərbaycan Respublikası Qanununun 7-ci maddəsinə uyğun olaraq bələdiyyələrin vahid informasiya sistemi yaradılır”

Qanunun digər bir maddəsində “Bələdiyyələrin vahid informasiya sistemi dövlət informasiya sistemi” olması göstərilir.

Tövsiyəyə uyğun olaraq “Dövlət informasiya ehtiyatlarının və sistemlərinin Nümunəvi Əsasnaməsi”nə uyğun olaraq, Sistem haqqında əsasnamənin ölkə ərazisində fəaliyyət göstərən bələdiyyələr tərəfindən birgə təsdiq edilməsi istiqamətində tədbirlərin həyata keçirilməsini üç ay müddətində təmin edilməli, və “Bələdiyyələrin statusu haqqında” Azərbaycan Respublikası Qanununun 10-2.3-cü maddəsinə uyğun olaraq, Sistemə ötürüləcək və Sistemdən əldə ediləcək məlumatların dairəsi ilə bağlı təkliflərini bir ay müddətində Azərbaycan Respublikasının Nazirlər Kabinetinə təqdim etməlidirlər.

Bu prosesin icrası ilə bağlı yaranan suallara Azərbaycan Bələdiyyələrinin Milli Assosiasiyalarından belə aydınlıq gətirilib ki, bu hüquqi sənədlər imzalandıqdan dərhal sonra ABMA-da geniş müşavirə keçirilmiş, ölkə başçısı tərəfindən qoyulan məsələlərin icrası ilə bağlı konkret addımların atılması üçün ABMA-nın  təcrübəli kadrlarından ibarət İşçi qrupunun təsis edilməsi qərara alınmışdır. İşçi qrupu ilk növbədə yaradılacaq “Vahid informasiya sisteminin əsasnaməsi”ni hazırlayacaq. Hazırlanan əsasnamənin ilkin versiyası  bələdiyyələrin birgə iştirakı ilə müzakirə edildikdən sonra hər bir bələdiyyə tərəfindən təsdiq ediləcək. Bununla yanaşı, Vahid informasiya sisteminə ötürüləcək və bu sistemdən əldə ediləcək məlumatların əhatə dairəsini müəyyən edən təkliflər paketidə hazırlanaraq təsdiq üçün Nazirlər Kabinetinə  təqdim ediləcəkdir.

ABMA- dan onu da bildiriblər ki, qanunlara edilən mütərəqqi  dəyişikliklər bələdiyyələrin maliyyə fəaliyyətinin tənzimlənməsində, şəffaflıq prinsiplərinin qorunmasında, hesabatlılığın təmin edilməsində və neqativ halların qarşısının alınmasında xüsusi əhəmiyyəti olacaqdır, odur ki, ABMA -nın kollektivi var qüvvəsi ilə prosesi göstərilən vaxt ərzində icrasını başa çatdırmağı  nəzərdə tutur.

Belediyye.info