Azərbaycan Bələdiyyələrinin Milli Assosiasiyalarının (ABMA) təşkilatçılığı və İqtisadiyyat Nazirliyinin, Qiymətləndiricilər Palatasının rəsmi nümayəndələrinin, habelə bir sıra şəhər və qəsəbə bələdiyyə sədrlərinin iştirakı ilə “Qiymətləndirmə sahəsində qanunvericiliyin tətbiqi üzrə bələdiyyələrin çətinlikləri və onların müzakirəsi” mövzusunda görüş keçirilib.

Belediyye.info xəbər verir ki, bu barədə Azərbaycan Şəhər Bələdiyyələrinin Milli Assosiasiyasının və Nərimanov bələdiyyəsinin sədri Təmraz Tağıyev məlumat verib. 

T. Tağıyev bildirib ki, “Qiymətləndirmə fəaliyyəti haqqında” Qanununun icrası ilə əlaqədar bələdiyyə fəaliyyətini tənzimləyən bəzi normativ-hüquqi aktlarda məcburi qiymətləndirmə ilə bağlı yeni qaydalar qüvvəyə minib. 

Belə ki, bələdiyyə mülkiyyətində olan torpaq sahələri fərdi yaşayış evinin tikintisi üçün bilavasitə satıldıqda qiymətlər, habelə hərraca va ya müsabiqəyə çıxarılan bələdiyyə mülkiyyətində olan torpaqların ilkin qiyməti normativ qiymətdən az olmamaq şərti ilə bazar məzənnələri nəzərə alınmaqla Azərbaycan Qiymətləndiricilər Palatası tərəfindən müəyyən ediləcək. 

Sədr qeyd edib ki, Qanunda edilən bu dəyişikliyin əsas məqsədi bələdiyyələrdə əvvəlki illərdə rast gəlinən neqativlərin aradan qaldırılması və şəffaflığın təmin edilməsidir. Qanunun icrası ilə bağlı bir sıra hüquqi sənədlər təsdiq edilərək artıq qüvvəyə minmişdir. Sədr bildirib ki, bu görüşün də keçirilməsinin əsas məqsədlərdən biri də qəbul edilən hüquqi sənədlər toplusu barədə bələdiyyələrin məlumatlandırılması və bütün tərəflərin iştirakı ilə bələdiyyələri narahat edən məsələlələrin müzakirəsidir. 

ABMA-nın əlaqələndirici koordinatoru Aydın Muradov mövzu ilə bağlı təklif və tövsiyələrini bildirməklə, bələdiyyələri qanunun icrası ilə bağlı yarana biləcək məsələləri aktiv şəkildə müzakirə etməyə çağırdı. 

Görüşdə İqtisadiyyat Nazirliyinin, Qiymətləndiricilər Palatasının rəsmi nümayəndələri, habelə bir sıra şəhər və qəsəbə  bələdiyyə sədrləri çıxış edərək qiymətləndirmə ilə bağlı bir sıra problemlər səsləndirilib və həlli istiqamətində qurumların nümayəndələri tərəfindən təkliflər verilib.

Sonda bələdiyyə mülkiyyətində olan torpaq sahələrinin qiymətlərinin təyin olunması üçün birgə ümumi metodologiyanın hazırlanması ilə bağlı razılıq eldə edilib. Məqsəd bələdiyyələr tərəfindən hərraca çıxarılan torpaqların satışında şəffaflığın təmin edilməsinə nail olmaqdır.

Ciddi fikir mübadiləsi şəraitində keçən görüşdə bələdiyyə sədrlərini narahat edən bir sıra vacib suallar rəsmi qurumların təmsilçiləri tərəfindən cavablandırılıb.