“Bələdiyyə sədri olaraq həyata keçirdiyim ilk irihəcmli  layihə Sabirabad şəhəri ərazisində gənclərin asudə vaxtının səmərəli keçirməsi və pis vərdişlərdən uzaqlaşması məqsədilə “İdman Sağlamlıq Mərkəzi”nin tikintisi olmuşdur”- bu fikirləri Belediyye.infoya Sabirabad bələdiyyəsinin sədri Kamran Mirzəyev  deyib. 

Ötən il ərzində Maliyyə Nazirliyinə təqdim etdiyimiz iki layihədən birinə “”İdman Sağlamlıq Mərkəzi”nin tikintisi” layihəsinə dəstək verildi. Layihənin icrasında həm də əsas məqsəd bələdiyyə üçün dayanıqlı maliyyə mənbəyinin yaradılmasıdır.  

Artıq mərkəzin tikintisində son tamamlama işləri gedir. Ən müasir idman qurğuları alınıb. May ayı ərzində mərkəzin açılışını nəzərdə tuturuq. 

Üç yüz kvadrat metrlik ərazidə inşa edilən mərkəz binası  bir böyük zaldan,  yuyunma otağından,  soyunub- geyinmə otağından və yardımçı otaqdan ibarətdir. Bələdiyyənin mülkiyyətində inşa edilən mərkəz binasının ətraf yükdaşıyıcı barısı qoşa daşla hörülüb və gənclərin məşq etməsi üçün hər cür şərait yaradılmaqdadır.

Sədr bildirib ki, hazırda bələdiyyə büdçəsini qənaətbəxş hesab etmədiyimizdən bu istiqamətdə ciddi  işlərin, məqsədli layihələrin icrasına start vermişik.

Bələdiyyənin hazırda DSMF-yə  və əmək haqqına borcu olmasa da, ilin əvvəlindən vergi daxilolmaları aşağı səviyyədədir.

Sədr qeyd edib ki, bələdiyyə büdcəsinin gəlirlərinin artırılması məqsədilə bələdiyyə ərazisində olan yaşayış və qeyri-yaşayış  obyektlərinin dəqiq  uçotunun aparılması, tədiyyə bildirişlərinin ödəyicilərə çatdırılması prosesi gedir. Bundan sonra vergi borclarının ödətdirilməsi məqsədilə   icra və probasiya şöbəsinə müracət edilməsi nəzərdə tutulmuşdur. Hazırda bələdiyyə ərazisində olan 6700 ev təsərrüfatı və 870 sahibkarlıq fəaliyyəti ilə məşğul olan fiziki şəxs haqqında məlumatlar BAMS proqramının bazasına  yerləşdirilib. Sadəcə ərazidə müəyyən faiz sənədsiz əmlakın olması nəticə etibarı ilə büdcə gəlirlərinə öz mənfi təsiri göstərməkdir.

Sədr bildirib ki, ötən il şəhər bələdiyyəsi olaraq əldə etdiyimiz maliyyə  vəsaitinin həcmi cəmi 64 min manata yaxın olub ki, onun da 50 faizə yaxın hissəsi torpaq satışından, 20 faizə yaxın hissəsi torpaq icarəsindən, 15 faizə yaxın hissəsi isə  əmlak vergisindən daxil olub. 

“Bələdiyyə sistemində həyata keçirilən islahatların önəmli bir hissəsi şəffaflığın artırılmasını, İKT texnologiyalarının tətbiqi sahələrinin genişləndirilməsini, vətəndaş-bələdiyyə təmaslarının minimuma endirilməsini əhatə edir”- bu fikirləri də Sabirabad bələdiyyəsinin sədri Kamran Mirzəyev bildirib. 

Sədr bildirib ki,  bu gün  BAMS proqramında tətbiq edilən yeniliklərin hər biri  vətəndaş müraciətlərinə daha operativ baxılmasına bir növ  şərait yaradır. BAMS-ın ƏMDX məlumat sisteminə inteqrasiya edilməsi səbəbindən cari ildə 150-dən artıq çıxarış alınmışdır. 

 Bildirişlərdə QR kod sisteminin tətbiqi, E-belediyye.az portalının istifadəyə verilməsi bir tərəfdən vətəndaş məmnunluğunun təmin edilməsinə, bələdiyyə-vətəndaş münasibətlərinin keyfiyyətcə daha yüksək pilləyə qaldırılmasına xidmət edirsə, digər tərəfdən bələdiyyənin büdcə gəlirlərinin artmasına önəmli şəkildə təsir göstərməkdədir.

Sədr bildirib ki, tətbiq edilən yeniliklərin ən vacib  məqsədi bələdiyyədə  şəffaflığın artırılmasıdır. Adminstrasiyanın bələdiyyələrlə iş sektorunun təşkilatçılığı ilə BAMS-ın Əmlak Məsələləri Dövlət Xidmətinin məlumat sisteminə qoşulması, o cümlədən BAMS-da  qeyd edilən yeniliklərin tətbiqi, BAMS-proqramında SMS xidmətinin istifadəyə verilməsi cari ildə bələdiyyələrin  büdcə gəlirlərinin daha çox artımına səbəb olacağna ümid edirəm. 

Sədr daha sonra qeyd edib ki, bələdiyyə iclasları hər ay ən azı bir dəfə,  müəyyən məsələlər olduqda  bəzən ay ərzində iki dəfə olaraq keçirilir. İclaslarda üzvlər tam şəkildə, bəzən üzrlü səbəbdən bir və ya iki nəfər az olmaqla iştirak edirlər.

Xatırladaq ki, Sabirabad bələdiyyəsinin 15 nəfər üzvü var və Kamran Mirzəyev sonuncu bələdiyyə seçkisində  2783  səs toplayaraq üzv seçilmiş və sıralamada birinci yeri tutmuşdur. Kamran Mirzəyev ikinci dəfədir ki,  bələdiyyə üzvü seçilib və ilk dəfə 18 fevral  2021-ci ildən, ikinci dəfə isə 2025-ci il 18 fevral tarixində  bələdiyyə sədri seçilmişdir. 

Belediyye.info