Düyərli Xeyriyyə Fondu barədə elə
yerli əhalidən məlumat aldıq, fond qeyri-rəsmi, kənd əhalisinin öz büdcələri hesabına formalaşdırdığı birlikdir. 10 000-dən artıq əhalisi olan Düyərli kəndinin əhalisi heyvandarlıq və əkinçiliklə məşğuldur. Kənd I və II Qarabağ müharibələrində ümumi 11 şəhid verib.
Kənd sakinlərinin öz təşəbbüsləri ilə yaradılmış, büdcəsi həm kənddə yaşayan sakinlərin, həm də Rusiyada, Bakıda işləyən şəmkirlilərin ianələri hesabına formalaşan Düyərli Xeyriyyə Fondu bu günədək bir çox yerli problemi həll edib, sosial problemləri aşkarlayaraq aradan qaldırıb. Kənd sakinlərinin verdiyi məlumata görə bugünədək ümumilikdə 300-dən artıq aztəminatlı, şəhid və könüllülər ailəsi olmaqla ümumi məbləği təxminən 20 min manat həcmində ərzaq və maddi yardımlar edilib və bütün məbləğ kənd sakinlərinin ianələri hesabına təmin edilib.
Habelə, 44 günlük Vətən müharibəsi dövründə ön cəbhədə vuruşan əsgərlərin, eləcə də kəndin könüllü əsgərlərinin ailələrinə 1 785,4 manat həcmində maddi vəsait və ərzaq yardımları edilib. Kəndin qaziləri daima diqqətdə saxlanır, müalicə və ehtiyacları fondun büdcəsindən qarşılanır. Əsir düşmüş hərbçilərimizin azad edilməsində sonra onlara və ailələrinə də baş çəkilib, maddi yardım göstərilib. Xeyriyyə Fondundan həmçinin ermənilərin 11 oktyabr 2020-ci il tarixində Gəncəyə raket atəşi nəticəsində hər 2 valideynlərini və doğmalarını itirən Xədicə və Nilay adlı körpələrə də maddi yardımlar göstərilib.
Aldığımız məlumata görə, adı Düyərli Xeyriyyə Fondu olsa da, yalnız Düyərli kəndində deyil, ölkəmizin müxtəlif bölgələrində yaşayan aztəminatlı ailələrə dəstək göstərilib. Eləcə də Kəlbəcərin yenidənqurma və bərpa işlərinə də öz büdcələrindən vəsait ayırıblar. Qeyd olunanlarla yanaşı, fond, 2023-cü ilin 6 fevral tarixində qardaş Türkiyə Respublikasında baş vermiş dəhşətli zəlzələ fəlakətləri nəticəsində evsiz-eşiksiz qalmış insanlara ərzaq, geyim və yataq dəstləri ilə yanaşı, maddi yardım da göstərib.
Fondun Düyərli kəndinə etdiyi ən böyük xidmətlərdən biri də kənd ərazisinin abadlaşdırılması, məişət tullantılarının təmizlənməsi üçün gördüyü işlərdir. “Təmiz Düyərli” layihəsinin işə başlaması üçün 2 yük maşını alınaraq fonda təhvil verilib və həmin maşınların köməyi ilə kənd ərzisində toplanan məişət tullantıları təyinatı üzrə daşınır.
Həmçinin I və II Qarabağ müharibələrində şəhid olmuş kənd sakinlərinin dəfn edildiyi məzarlıqda abadlıq, yenidənqurma və bərpa işləri aparılıb. Düyərli Xeyriyyə Fondu həm Düyərli kəndində yaşayan, həm də kənardan müraciət edən, müxtəlif növ xəstəliklərdən əziyyət çəkən insanların müalicəsi, habelə əlil arabası və digər dərman preparatlarının alınması üçün ümumilikdə 10 196,87 manat məbləğində maddi yardım sərf edib. Düyərli Xeyriyyə Fondunun büdcəsindən təhsilə də maliyyə ayrılır. Həm Azərbaycanda, həm də ölkə xaricində oxuyan kənd sakinlərinin maddi ehtiyacları bu fondun büdcəsindən qarşılanır. Eləcə də, sözügedən büdcə hesabına kənddə sünnət yaşına çatmış uşaqların sünnət mərasimi həyata keçirilib, ailələrinə maddi dəstək göstərilib.
Fondun təşəbbüsü ilə kəndin adı yazılmış və kənd şəhidlərinin fotoları həkk etdilmiş trafaret hazırlanıb və bu trafareti kəndin girişinə qoymaq üçün əraziyə nəzarəti həyata keçirən aidiyyəti dövlət orqanına müraciət edilərək razılıb alınıb. Qeyd edək ki, trafaret sözügedən fondun maliyyəsi hesabına hazırlanıb. Bölgədəki yol infrastrukturunun yenilənməsi və kəndin əsas girişinin yer dəyişdirməsi səbəbindən bu trafaret kəndin əvvəlki girişindən götürülərək yeni mərkəzi girişinə köçürülüb. Yeni trafaretdə həmçinin şəhidlərin əksi də həkk edilməsi planlaşdırılıb, bunun üçün hazırlıq görülüb, şəhid fotoları böyüdülüb.
Düyərli kəndinin şəhidlərinin portretlərinin əks olunduğu trafaretin qoyulması həm şəhid ailələrinin, həm də kənd sakinlərinin istəyi olub. Lakin trafaretin gövdə hissəsi qoyulduğu gün Şəmkir Rayon İcra Hakimiyyərinin başçısı Rəşad Tağıyev tərəfindən verilən göstərişlə kobudluqla sökülərək yerlə-yeksan edilib. Trafaretin sökülməsində xüsusi “payı” olanlardan polis nəfəri Anar İsgəndərov və Şəmkir RİH-nin Ərazi idarəetmə və yerli özünüidarəetmə orqanları ilə iş şöbəsinin müdiri Rasim Mustafayev olub. Hətta icra başçısı Rəşad Tağıyevin sözügedən trafaretin sökülərək yerlə-yeksan edilməsi üçün məhz Rasim Mustafayevin vasitəsilə yerli icra nümayəndəsi və bələdiyyə sədrinə 10 dəqiqə vaxt verdiyi də redaksiyamıza verilən məlumatlar arasındadır. Kənd sakinlərinin dediyinə görə həmin trafaret ildırım sürətilə və çox kobudluqla sökülərək yerlə-yeksan edilib. Bunu əks etdirən video və foto çəkilişlər də var. Şəhidlərin xatirəsinə ucaldılan trafaretin dağıdılması tək həmin kəndin əhalisinə qarşı deyil, eyni zamanda Azərbaycan şəhidlərinə, Azərbaycan xalqına edilmiş ən böyük hörmətsizlikdir.
Kənd şəhidlərinin ailələrinin üzvləri İcra Hakimiyyətinə gedərək başçı Rəşad Tağıyevlə görüşərək Azərbaycanın bütövlüyü uğrunda şəhid olmuş 11 kənd sakininin fotosunun trafaretdə həkk olunmasına və trafaretin qoyulmasına icazə verilməsini xahiş etmək istəsələr də başçı onlarla görüşdən imtina edib. Şəhid ailələrinin dediyinə görə onları icra hakimiyyətinin şöbə müdirləri Rasim Mustafayev, Sərdar Namazov və başçının köməkçisi Mahir Əliyev qəbul edərək bu işin mümkünsüzlüyü və həmin trafaretin dərhal sökülməsi ilə bağlı başçının göstərişi olduğunu qeyd ediblər.
Düyərli kəndinin sakinləri, torpaqlarımızın azadlığı uğrunda həlak olan 11 Düyərli şəhidinin ailələri mətbuat vasitəsi ilə ölkə rəhbərinə müraciət edir, şəhidlərin adının əbədiləşdirilməsi üçün kəndin girişinə trafaretin qoyulmasına göstəriş verməyi xahiş edir. Qeyd edək ki, trafaretin bütün xərcləri Düyərli Xeyriyyə Fondunun büdcəsi hesabına təmin ediləcək.
Sözügedən mübahisədə adıçəkilən qarşı tərəfin mövqeyini işıqlandırmağa hazırıq.
Lalə Mehralı
https://sesqazeti.az/news/news/1221878.html
1794
+
Rəylər
0 Rəy