Birinci Qarabağ müharibəsi şəhidi Ramin Qasımovun adını daşıyan küçədə abadlıq-təmir işləri aparıldı.

Azərbaycan Prezidenti cənab İlham Əliyevin yüksək siyasəti, milli maraqlara söykənən daxili və xarici siyasəti nəticəsində Azərbaycan dünyanın ən böyük və mühüm dövlətlərarası tədbirlərindən biri olan COP29-a ev sahibliyi etməsi cənab Prezidentin növbəti təntənəli qələbəsidir.

2024-cü il Azərbaycanda “Yaşıl dünya naminə həmrəylik ili” elan edilmişdir.

“Yaşıl dünya naminə həmrəylik ili” çərçivəsində Bakının ən böyük rayonlarından biri olan Xəzər rayonu və onun mərkəzi qəsəbəsi olan Mərdəkan qəsəbəsində də abadlıq, yenidənqurma, yaşıllaşdırma işləri uğurla həyata keçirilib. 

İl çərçivəsində Mərdəkan bələdiyyəsi tərəfindən qəsəbə ərazisində “Yaşıl dünya naminə həmrəy olaq!” və “Qəsəbəmizin yaşıl gələcəyinə doğru! devizi altında yaşıllaşdırma kampaniyaları təşkil olunmuşdur. Kampaniyalar çərçivəsində qəsəbə ərazisində 1000-nə yaxın cavan ağac tingləri, 600-ə yaxın isə həmişəyaşıl kollar əkilmişdir.

Mərdəkan tarixi abidələri, möhtəşəm iki böyük Qalaları, sanatoriyaları və məşhur milyonçuların bağları ilə məşhurdur. Bu səbəbdən də, Xəzər dənizinin sahilinin gözəl havası, xüsusən də yaz-yay aylarında qəsəbəyə gələn turistlərin, qonaqların da gəlişinə səbəb olur. Ekoloji davamlılıq, ətraf mühitin yaxşılaşdırılması və qorunması məqsədilə, təşkil olunan aksiyalarda sakinlərimiz də fəal iştirak edirlər. Lakin görülən işlərlə yanaşı bəzi problemlər də mövcuddur.

Qəsəbə sakinləri ilə görüş zamanı Birinci Qarabağ müharibəsi şəhidi Ramin Qasımovun adını daşıyan küçədə yaşayan sakinlər piyada keçidinin təmir olunmasını, köhnəlmiş bordurların dəyişdirilməsini və ərazidə olan qurumuş ağacların kəsildikdən sonra, yerində qalan kötüklərin çıxarılmasını və yerinə cavan Şam ağaclarının əkilməsini xahiş etmişlər.

Şəhid adı bizim üçün uca zirvədir. Vətənpərvər igid övladlarımız öz canları hesabına torpaqlarımızı işğaldan azad edərək şəhid oldular. Onların sayəsində torpaqlarımız bütövləşdi, suverenliyimiz bərpa oldu. Biz hər zaman şəhidlərimizə borcluyuq.

Şəhidin adını daşıyan küçə çox gedişli-gəlişli yoldur. Həm şagirdlər, həm xəstələr həm də digər insanlar 1941-1945-ci illər “Xatirə parkı”ndan keçərək H.Z.Tağıyev məqbərəsinə, “Pir Həsən” ziyarətgahına, Xəzər Tibb Mərkəzinə,                 183 nömrəli tam orta məktəbə və Dövlət Sərhəd Xidmətinin Xüsusi məktəbinə getmək üçün bu yoldan istifadə edirlər.

Qeyd olunan ünvanda qurumuş ağaclar kəsildikdən sonra, yerində qalmış kötüklər çıxarılmış, köhnəlmiş, dağılmış vəziyyətdə olan bordurlar yeniləri ilə əvəzlənmişdir. Piyada səkisi təmir olunmuş, yolun genişlənmiş bir hissəsinə və piyada səkisinə asfalt örtüyü salınmışdır. Daha sonra çıxarılmış kötüklərin yerinə cavan Şam ağacları əkilib, suvarılmışdır.

Küçəyə şəhidin adını əks etdirən lövhə də vurulmuşdur. Küçə təmir olunduqdan sonra, sakinlərin rahat gediş-gəlişi üçün onların istifadəsinə verilmişdir. 

Xəzər rayonu,

Mərdəkan bələdiyyəsi