"“Yaşıl dünya naminə həmrəylik ili” çərçivəsində Suraxanı RİH-in təşəbbüsü və Qaraçuxur bələdiyyəsinin təşkilatçılığı ilə qəsəbədə növbəti ağacəkmə aksiyası həyata keçirilib"- bu barədə məlumatı adıçəkilən bələdiyyənin sədri İxtiyar Nəcəfov bildirib.

Belediyye.info  xəbər verir ki,  Qaraçuxur bələdiyyəsinin sədri İxtiyar Nəcəfovun da iştirak etdiyi aksiyada, bələdiyyə qulluqçuları və  könüllülər  iştirak edib.

Bildirilir ki, qəsəbənin Nazim İsmayılov küçəsində keçirilən aksiya zamanı 1000 ədəd “Eldar” şamı əkilərək aqrotexniki qulluq göstərilib və ərazidə müvafiq abadlıq işləri aparılıb.

Sədr qeyd edib ki, sözügedən ərazidə  gələcəkdə maliyyə imkanları çərçivəsində ağacların effektiv sulanması və su israfının qarşısının alınması məqsədilə damcılı suvarma sistemindən istifadə nəzərdə tutulub.

 Bildirilir ki, aksiyanın keçirilməsində məqsəd  qəsəbə ərazisində ekoloji tarazlığın bərpasına, ətraf mühitin qorunmasına kömək etmək, atmosferi oksigenlə zənginləşdirmək, ictimaiyyətin diqqətini yaşıllıqların qorunmasına yönəltməkdir.

Qaraçuxur bələdiyyəsi bu cür ekoloji aksiyaların mütəmadi olaraq təşkili ilə ətraf mühitin mühafizəsinin vacibliyini insanların, xüsusilə, gənc nəslin diqqətinə çatdırır və onları ekoloji problemlərə qarşı mübarizədə birgə fəaliyyətə səsləyir.

Sədr qeyd edib ki, bu cür yaşıllıq zolaqlarının salınması, yaşıllaşdırma fəaliyyətləri ekoloji tarazlığın bərpasına və havanın keyfiyyətinin artırılmasına müsbət təsir edən amillərdəndir.
Belediyye.info