"Əsas məqsədimiz -az imkanla çox nəticə əldə etməkdir"

*****

“Bələdiyyə sədri olaraq fəaliyyətimə başladığım ilk gündən vətəndaşların ehtiyaclarını öyrənmək və prioritet məsələləri müəyyənləşdirmək əsas hədəfim olub”- bu fikirləri Şabran bələdiyyəsinin yeni seşilmiş sədri, az vaxt ərzində fəaliyyəti ilə diqqətiçəkən Fidan Fərzəliyeva bildirib.

Sözünə davam edən sədr daha sonra  bunları qeyd edib: “İlk addım olaraq sakinlərlə mütəmadi görüşlər təşkil etməyə başladım. Əhalinin müraciətləri əsasında yolların təmiri, ərazi təmizliyi və sosial qayğıya ehtiyacı olan ailələrin dəstəklənməsi istiqamətində işlərə start verildi. İlk icra etdiyimiz layihələrdən biri də Şabran bələdiyyəsinə birləşdirilən kənd daxili yolların bərpası və ehtiyacı olan ailələrə ərzaq yardımı olmuşdur.

Bələdiyyə büdcəsinin hazır ki durumuna toxunan sədr qeyd edib ki, "hazırda bələdiyyənin büdcəsi məhdud imkanlara malikdir. Lakin bu vəziyyət bizi dayandırmır. Mövcud resurslardan səmərəli istifadə etməyə çalışır, prioritet məsələləri düzgün müəyyənləşdirərək mərhələli şəkildə həllinə çalışırıq. Əlavə maliyyə mənbələri cəlb etmək, layihələrə sponsor dəstəyi tapmaq və daha şəffaf idarəetmə qurmaq istiqamətində də addımlar atırıq. Əsas məqsədimiz -az imkanla, daha çox nəticə əldə etməkdir."

 “DSMF və əməkhaqqı borcun olması və əgər varsa nə vaxt və hansı səbəbdən yaranmasına aydınlıq gətirən" sədr bildirib ki,   "bəli, əvvəlki dövrlərdən qalan müəyyən məbləğdə DSMF və əmək haqqı ilə bağlı borclar mövcuddur. Bu borcların tədricən və qanunvericiliyə uyğun şəkildə ödənilməsi istiqamətində tədbirlər görülür. Hazırki rəhbərlik olaraq şəffaf maliyyə idarəçiliyi prinsiplərinə sadiq qalaraq bu məsələlərin tam həllinə çalışırıq. Eyni zamanda, bu kimi halların təkrar yaşanmaması üçün büdcə planlamasına və xərclərin səmərəliliyinə xüsusi diqqət yetiririk."

Vergidaxilolmalarının vəziyyətinə toxunan sədr qeyd edib ki,  hazırda bələdiyyə büdcəsinə daxil olan vergi və rüsumlar əvvəlki dövrlərlə müqayisədə daha sabit və davamlı şəkildədir. Bu da şəffaf idarəçilik, sakinlərlə aparılan maarifləndirmə işləri və vergi öhdəliklərinə məsuliyyətli yanaşmanın nəticəsidir. Daxilolmaların artırılması üçün əlavə tədbirlər də görülür – qeyri-aktiv torpaq sahələrinin qeydiyyata alınması, sahibkarlıq fəaliyyətinin stimullaşdırılması və yerli resurslardan səmərəli istifadə bu istiqamətdə atılan addımlardandır."

Fidan Fərzəlieyva daha sonra qeyd edib ki, bələdiyyə büdcəsinin möhkəmləndirilməsi və mövcud borcların tədricən ödənilməsi istiqamətində konkret addımlar atılır. İlk növbədə, yerli vergi və ödənişlərin toplanmasına nəzarət gücləndirilib, borclu vergiödəyicilərlə maarifləndirici və fərdi işlər aparılır. Eyni zamanda, istifadəsiz qalan bələdiyyə torpaqlarının icarəyə verilməsi və rəsmi qeydiyyata alınaraq dövriyyəyə daxil edilməsi yolu ilə əlavə gəlir mənbələri formalaşdırılır. Bundan əlavə, müxtəlif dövlət proqramlarına və layihələrə müraciət etməklə əlavə maliyyə resurslarının cəlb olunması üçün iş aparırıq. Gəlirlərin səmərəli idarə olunması, xərclərin optimallaşdırılması və şəffaf maliyyə mexanizmləri hesabına həm büdcə balansı qorunur, həm də borcların bağlanması istiqamətində mərhələli nəticələr əldə edilir.

"Bəs bu gün  bələdiyyə iclasının keçirilmə vəziyyəti nə yerdədir,"- sualına sədr belə cavab verib:  - Bələdiyyə iclaslarının keçirilməsi mütəmadi və qanunvericiliyin tələblərinə uyğun şəkildə təşkil olunur. İclaslarda gündəlikdə olan məsələlər ətraflı müzakirə edilir, qəbul olunan qərarlar isə yerli əhalinin maraqlarını nəzərə almaqla verilir. Hər bir iclasdan sonra qərarların icrasına nəzarət olunur və şəffaflığın təmin edilməsi məqsədilə açıq məlumatlandırma aparılır.İclaslarda həm bələdiyyə üzvlərinin, həm də bəzən yerli ictimaiyyətin iştirakı təmin edilir ki, qərarlar daha dolğun və sosial yönümlü olsun. Məqsədimiz birgə qərarvermə yolu ilə dayanıqlı və ictimai fayda verən təşəbbüslərin həyata keçirilməsidir.

Qeyd edək ki, seçki prosesində 2320 səs toplayaraq siyahida birinci yeri tutan Fidan Fərzəliyeva  18 fevral 2025 -ci il tarixində 15  bələdiyyə üzvünün iştirakı ilə keçirilən iclasda  yekdilliklə sədr seçilib. 

Belediyye.info