"Şabran rayonunda əvvəlki illərdə  15 yerliözünüidarəetmə qurumu fəaliyyətdə olub.  Birləşdirmədən sonra rayonda artıq  5 bələdiyyə fəaliyyətdədir" - bu fikirləri Şabran şəhər bələdiyyəsinin sədri Fidan Fərzəliyeva "Bələdiyyələrin fəaliyyətinin təbliği" İctimai birliyinin sədri Vüqar Tofiqlinin və rayon bələdiyyə sədrlərinin iştirakı ilə keçirilən görüşdə deyib. Qeyd edək ki, adıçəkilən görüşdə Ağalıq bələdiyyəsinin sədri Elnur Beybalayev, Pirəbədil bələdiyyəsinin sədri Atabala Şeydayev, Rəhimli bələdiyyəsinin sədri Əlirəhim Bibiquliyev , Gəndov bələdiyyəsinin sədri Vüsal Rüstəmov  iştirak edib.  

Görüşdə Şabran bələdiyyələrinin maliyyə vəziyyəti, üzləşdikləri problemlər müzakirə edilmişdir.  Təəssüflə bildirilmişdir ki, birləşdirmədən sonra bəzi bələdiyyələrdə əvvəlki illərdə yığılıb qalmış DSMF və əməkhaqqqı borcunun hesabına hazırda  bəzi bələdiyyələrin bank hesabı bağlanıb, hər hansı formada əməliyyatın aparılması mümkün deyildir.

Görüşün təşkilatçısı olan  Şabran bələdiyyəsinin sədri Fidan Fərzəliyeva az vaxt ərzində bələdiyyənin maliyyə durumunun yaxşılaşdırılması üçün strateji proqramın hazırlandığını və bələdiyyənində fəaliyyətinin məhz bu istiqamətdə qurulduğunu bildirmişdir.

Ağalıq bələdiyyəsinin sədri Elnur Beybalayev rəhbərlik etdiyi bələdiyyənin hər hansı formada borcu olmadığını qeyd edərək, yenilənmiş və təkmilləşdirilmiş BAMS-ın yaratdığı imkandan yaralanmağa çalışdığını bildirib. 

Pirəbədil bələdiyyəsinin sədri Atabala Şeydayev birləşdirilən bələdiyyələrdə mövcud olmuş borcların aqibətinin  necə olacağı və sabiq sədrlərin bu prosesdə məsuliyyət daşımalı olduğunu qeyd edib. Bu gün birləşdirilən bələdiyyələrin DSMF borcları hesabına Pirəbədil bələdiyyəsi ciddi problemlərlə üz-üzə qalıb.  

Rəhimli bələdiyyəsinin sədri Əlirəhim Bibiquliyev altıncı dəfədir ki, bələdiyyə üzvü və sədri seçildiyini qeyd edib. Sədr təəssüflə bildirib ki, bələdiyyənin məhz onun rəhbərliyi dövründə  10 min manata yaxın DSMF borcu yaranıb.  Vergilərin toplanılmasında problemlər, əmlakın 80 fazinin sənədinin olmaması bələdiyyənin büdcə gəlirlərinin aşağı olmasına və borcu bağlamaq şansının olmamasına səbəb olub. 

Gəndov bələdiyyəsinin sədri Vüsal Rüstəmov da bələdiyyənin çoxsaylı problemlə üz-üzə qalması səbəbindən ərazidə hər hansı ciddi layihə icra edə bilməməsindən gileylənib.

"Bələdiyyələrin fəaliyyətinin təbliği" İctimai birliyinin sədri Vüqar Tofiqli görüşdə bələdiyyələrin maliyyə gəlirlərinin artırılması üçün Azərbaycan Bələdiyyələrinin Milli Assosiasiyası tərəfindən müəyyən addımların atıldığını, Adminstrasiyanın müvafiq sektorunun təşkilatçılığı ilə  BAMS proqramının ƏMDX məlumat sisteminə inteqrasiya edilməsi həyata keçirilmiş, BAMS proqramında ciddi yeniliklər həyata keçirilmiş, SMS xidməti istifadəyə verilmişdir.  Bu günlərdə istifadəyə verilən e-belediyye.az portalı bələdiyyə-vətəndaş münasibətlərinin tənzimlənməsində mühüm rol oynayacağını xüsusilə qeyd etmişdir.

Sonda  Fidan Fərzəliyeva 2025-ci ilin Şabran bələdiyyələri üçün dönüş ili olacağına əminliyini vurğulamış və Şabran RİH-in dəstəyi ilə bələdiyyələrin üzləşdikləri bir sıra problemlərin tezliklə öz həllini tapacağına inandığını qeyd edib. 

Sonda görüş iştirakçılarının  xatirə  şəkli çəkilmişdir.