Yaşar Abdullayev,  Gəncə şəhər Kəpəz Bələdiyyəsinin sədri

Bəşər tarixinin ən qanlı və faciəli səhifələrindən biri olan Xocalı soyqırımı Azərbaycan xalqına qarşı törədilmiş ağır cinayətdir. 1992-ci il fevralın 25-dən 26-na keçən gecə dinc əhaliyə qarşı həyata keçirilmiş amansız zorakılıq aktı öz qəddarlığı və qeyri-insani üsulları ilə təkcə bir xalqa deyil, bütün bəşəriyyətə qarşı yönəlmiş cinayət kimi tarixə həkk olunmuşdur.

Ümummilli Lider Heydər Əliyev Xocalı faciəsini Azərbaycan xalqına qarşı həyata keçirilmiş soyqırım kimi qiymətləndirərək bu hadisəni bəşər tarixində görünməmiş vəhşilik nümunəsi adlandırmışdır. Bu siyasi-hüquqi qiymət Xocalı həqiqətlərinin beynəlxalq müstəvidə tanıdılması istiqamətində atılan mühüm addımların əsasını təşkil etmişdir.

Məhz Ulu Öndər Heydər Əliyevin qətiyyətli mövqeyi nəticəsində 1994-cü il fevralın 24-də Azərbaycan Respublikasının Milli Məclisi tərəfindən “Xocalı soyqırımı günü haqqında” qərar qəbul edilmişdir. Həmin qərar Xocalı faciəsinə rəsmi hüquqi-siyasi qiymətin verilməsi, həqiqətlərin dünya ictimaiyyətinə çatdırılması və qurbanların xatirəsinin əbədiləşdirilməsi baxımından mühüm əhəmiyyət kəsb etmişdir. Bu sənəd Azərbaycan dövlətinin öz tarixi yaddaşına və ədalət prinsipinə sadiqliyinin bariz nümunəsidir. Xocalı soyqırımının tanıdılması istiqamətində atılan bu addım həm də gələcək nəsillərə həqiqətlərin çatdırılması, faciənin unudulmaması və beynəlxalq miqyasda obyektiv qiymət alması məqsədini daşıyır.

Xocalı faciəsinin qurbanlarının xatirəsinin əbədiləşdirilməsi istiqamətində dövlət səviyyəsində ardıcıl tədbirlər həyata keçirilir. 2024-cü il fevralın 26-da Xocalı-Əsgəran avtomobil yolunun üzərində Xocalı Soyqırımı Memorial Kompleksinin təməlqoyma mərasimi keçirilmişdir. 2025-ci il fevralın 25-də isə Azərbaycan Respublikasının Prezidenti İlham Əliyev “Xocalı şəhərində Xocalı Soyqırımı Memorial Kompleksinin yaradılması haqqında” Sərəncam imzalamışdır.

Heydər Əliyev Fondunun təşəbbüsü ilə yaradılan memorial kompleksdə faciənin baş verdiyi gecənin dəhşətli hadisələri, Xocalının tarixi və coğrafi əhəmiyyəti, işğaldan əvvəlki həyat, həmçinin dinc əhaliyə qarşı törədilmiş cinayətin faktları əks olunacaq. Burada rayonun maketi, şahid ifadələri, qurbanların taleləri, sənədli materiallar və videoməlumatlar vasitəsilə Xocalı həqiqətləri ziyarətçilərə təqdim ediləcək. Eyni zamanda, şəhərin işğaldan azad olunması və cinayətkarların məsuliyyətə cəlb edilməsi istiqamətində görülmüş işlər barədə məlumatlar da yer alacaq.

Xocalı soyqırımı Azərbaycan xalqının yaddaşında sağalmaz yara kimi yaşayır. Bu faciənin unudulmaması, dünya ictimaiyyətinə doğru və dolğun şəkildə çatdırılması hər birimizin mənəvi borcudur. Şəhidlərimizin əziz xatirəsini dərin ehtiramla yad edir, tarixi həqiqətlərin yaşadılması naminə birliyimizi nümayiş etdiririk.