“Bələdiyyənin əsas gəlir mənbələrini torpaq və əmlak vergiləri təşkil edir. 2025-ci ilin aprel ayı ilə müqayisədə cari  ilin müvafiq dövründə bələdiyyənin gəlirlərində artım müşahidə olunmuşdur”- bu fikirləri Belediyye.infoya Sabunçu rayonu, Balaxanı bələdiyyəsinin sədri  Səkinə Kərimova deyib.

 Sədr bildirib ki, 2025-ci ilin aprel ayında torpaq vergisi üzrə daxilolmalar 1.402 manat, əmlak vergisi üzrə daxilolmalar 9.992 manat, maliyyə sanksiyaları üzrə daxilolmalar isə 50 manat təşkil etmiş, ümumi daxilolmalar 11.444 manat olmuşdur.

 2026-cı ilin aprel ayında isə torpaq vergisi üzrə daxilolmalar 8.047 manat, əmlak vergisi üzrə daxilolmalar      4.783 manat, stasionar ödənişlər üzrə 200 manat, maliyyə sanksiyaları üzrə isə 51 manat daxil olmuşdur. Bununla da ümumi daxilolmalar 13.081 manat təşkil etmişdir.

 Sədr qeyd edib ki,  əvvəlki ilin müvafiq dövrü ilə müqayisədə ümumi gəlirlərdə artım qeydə alınmış və vergi daxilolmalarının artırılması istiqamətində işlər davam etdirilməkdədir.

 Bununla yanaşı, qəsəbə ərazisində abadlıq və təmizlik işləri də həyata keçirilmişdir. 28 May küçəsində məişət tullantılarının ərazidən daşınması, ərazinin təmizlənməsi və yollara şeben materialının yayılması təmin edilmişdir. Həmin işlər üçün ümumilikdə 4.200 manat vəsait sərf olunmuşdur.

 Eyni zamanda, Elnur Dadıyev küçəsində yollara daş tozu və şeben materialının yayılması, eləcə də tamet işlərinin görülməsi həyata keçirilmişdir. Görülmüş işlərə 1.862 manat vəsait xərclənmişdir.

 Son dövrlərdə müşahidə olunan aramsız yağışların yaratdığı çətinliklərin aradan qaldırılması və su basma hallarının qarşısının alınması məqsədilə bələdiyyə tərəfindən 150 millimetrlik su nasosu alınmışdır. Nasos vasitəsilə qəsəbənin su basmış ərazilərindən yağış sularının çəkilməsi təmin edilmişdir. Həmin məqsədlə       2.325 manat məbləğində vəsait sərf olunmuşdur.

 Aprel ayı ərzində bələdiyyə tərəfindən sosial yönümlü tədbirlərin həyata keçirilməsi diqqət mərkəzində saxlanılmışdır. Belə ki, qəsəbə ərazisində yaşayan aztəminatlı ailələrə maddi yardımlar göstərilmiş, sosial həssas əhali qruplarına dəstək məqsədilə ümumilikdə 1.164 manat məbləğində maliyyə yardımı ayrılmışdır.

 Sonda bildiririk ki,  Balaxanı Bələdiyyəsi tərəfindən qəsəbə ərazisində abadlıq, sosial müdafiə və infrastruktur sahələrində işlərin davam etdirilməsi nəzərdə tutulur və yerli əhalinin sosial rifahının yaxşılaşdırılması istiqamətində tədbirlər ardıcıl şəkildə həyata keçiriləcəkdir.

Belediyye.info