"Rus qəbirləri dağıdılıb, yerinə azərbaycanlılar dəfn olunur" - deyə sosial şəbəkədə şər böhtan xarakterli video paylaşan şəxs həmin qəbristanlığın keçmiş əməkdaşı imiş.

Məlumata görə həmin şəxs, incikliyindən bu böhtan dolu video ilə qisas almağa çalışıb.

Qəbiristanlıq əməkdaşlarının nüfuzuna, həmçinin tolerant siyasi təmələ malik dövlət siyasətinə zidd motivi ilə kölgə salan bu video ilə bağlı  Azmedia.Az-a açıqlama verən Mingəçevir şəhər Bələdiyyəsinin Qəbristanlıqların saxlanılması və nəzarəti şöbəsinin müdiri Rafael Məmmədov bildirib ki, videoda görüntülənən kadrlar Mingəçevirin ən böyük beynəlmiləl məzarlıq ünvanı olan "Əli" qəbiristanlığında lentə alınıb.

Onun sözlərinə görə burada müxtəlif millət, din və təriqətlərə mənsub 15 mindən çox məzar yerləşir. O cümlədən, rus, alman, ukrayn, erməni və başqa fərqli dini xüsusiyyətli qəbirlər.

"Bura müqəddəs ünvan, imicimiz isə dünyada tolerantlıqla məşhurdur. Əməkdaşlarımız da dövlətimizin, dinimizin və insanlığımızın prinsiplərə uyğun olaraq ərazidəki bütün məzarlara və ətrafına eyni diqqətlə yanaşır. Videoda  bəzi qəbirüstü betonları çəkib guya onların ruslara məxsus olduğu və oradan guya məzarların çıxarılaraq yerlərinin azərbaycanlılara satılması barədə iyrənc və utancverici iddia, şər və böhtan xarakterindən başqa bir anlam daşımır. Üstəlik bu böhtana təkcə əməkdaşlar deyil, bütün xalqın mənəvi dəyərləri hədəf seçilir. Rus qəbirləri deyib müəllifin sayaqladığı bir neçə məzar əslində ermənilərə aiddir. Kimsə onlara toxunmayıb. Hər kəs gəlib qəbristanlığı dolaşıb müşahidə apara bilər. Ərazimizdə çoxsayda erməni və rus qəbirləri yerləşir. Hər birinin də baş daşı, qəbirüstü bərkidici elementlər öz yerindədir. Sadəcə bir neçə köhnə məzarın üstündəki beton örtük aşınmaya məruz qalıb, vəsaalam. Bunu  az qala cinayət motivinə çevirib sosial şəbəkədə paylaşmaq, alver hədəfinə çevrildiyini iddia etmək ağılsızlıq olduğu qədər də, müəllifi ağır cinayət məsuliyyəti altına sürükləyən məsuliyyətsizlikdir."

Rafael Məmmədov böhtan dolu videonun müəllifi haqqında da məlumat verib. O bu sıravi  kadrlarla böhtan xarakterli məlumat paylaşan şəxsin elə "Əli qəbristanlığı"nın qəbir daşları  sexinin keçmiş əməkdaşı olduğunu deyir. Həmin şəxs vaxtilə işdən uzaqlaşdırılmasını ürəyində inciklik məsləsinə çevirərək nə vaxtsa qisas almaq həvəsinə düşüb. Amma nə yazıq ki, qaş düzəltmək istədiyi zaman, göz çıxarıb. Qeyd edək ki, məsələyə aydınlıq gətirilməsi üçün, şəhər İcra Hakimiyyəti başçısı, Bələdiyyə sədri, Dini Qurumlarla İş üzrə Dövlət  Komitəsinin yerli nümayəndəsi və digər aidiyyati qurumların təmsilçiləri qəbristanlığa gələrək əraziyə baxış keçirib. Məlum videonun şər böhtan xarakteri daşıdığına şahidlik edib.