Azərbaycan bələdiyyələrinə qarşılaşdıqları problemlərin həlli, o cümlədən müəyyən layihələrin icra edilməsi ilə bağlı yarandığı gündən etibarən hər il dövlət büdcəsindən dotasiya ayrılıb.

Bunu Modern.az-a açıqlamasında "Bələdiyyələrin fəaliyyətinin təbliği” ictimai birliyinin sədri Vüqar Tofiqli bildirib.

O qeyd edib ki, son bir neçə ildə isə dotasiya ilə yanaşı subvensiyanın ayrılması ilə bağlı qərar verilib.

"Bələdiyyələrə ayrılan subvensiyanin həcmi 1 milyon 550 min manatadək artırılıb. Cari ildə isə bələdiyyələrə təqribən 6.5 milyon manat dotasiya, 1 milyon 550 min manat isə subvensiya ayrılacaq. Ümumiyyətlə beynəlxalq təcrübədə bələdiyyələrə dövlət tərəfindən dotasiya və subvensiya ayrılır. O cümlədən onlar həmdə qanunvericilik qaydasında vergilərin yığılmasını həyata keçirilir. Burada əsas məqsəd yerli özünüidarəetmə orqanı olan bələdiyyələrin üzləşdiyi çətinliklərin aradan qaldırılması, o cümlədən onların seçicilərinə göstərdiyi xidmət səviyyəsini artırmaq, vətəndaşların problemlərinə dəstək vermək, layihələrin icra edilməsinə şərait yaratmaqdır. Güman edirəm ki, Azərbaycanda bundan sonrakı dövrdə bələdiyyələrə xüsusilə subvensiya məbləği artırılmalıdır".

Müsahibimizin sözlərinə görə, burada atılacaq addımlardan biri də dotasiya və subvensiyanin ayrılmasında mövcud neqativin aradan qaldırılması olmalıdır:

“Bələdiyyələrə subvensiya layihələrinin ayrılması ilə bağlı hər hansı şəffaflıq təmin edilmir. Bunu həyata keçirən Maliyyə Nazirliyidir. Bu günə qədər ayırdığı subvensiya layihələri ilə bağlı keçirdiyi müsabiqənin şərtləri, forma və məzmunu, hansı bələdiyyələrə ayrılması, bələdiyyələrin layihənin icrasını hansı şəkildə həyata keçirməsi ilə bağlı Maliyyə Nazirliyi hər hansı formada şəffaflığı təmin etmir. Hər il 4-5 bələdiyyəyə bu istiqamətdə maliyyə vəsaiti ayrılır. Amma məlumat yoxdur ki, hansı bələdiyyələrə ayrılıb, vəsait necə xərclənir, bələdiyyədə dayanıqlı maliyyə mənbəyi yaradıla bilibmi. Tək-tük bələdiyyə var ki, onlara ayrılan subvensiya çərçivəsində müəyyən layihə icra etdiklərini paylaşıblar. Əslində subvensiya ayrılmasında əsas məqsəd bələdiyyələrdə dayanıqlı maliyyə mənbəyinin yaradılmasına yardım etməkdir. Güman edirəm ki, Nazirlik tərəfindən müəyyən addımlar atılsa, şəffaflıq təmin edilsə və Milli Məclis tərəfindən məbləğin artırılması ilə bağlı qərar qəbul edilsə, bələdiyyələr özləri dayanıqlı maliyyə mənbələrini yarada bilərlər. Bu da bələdiyyələrin müəyyən mənada üzləşdiyi çətinliklərin aradan qaldırılmasına təkan verər. Bu istiqamətdə müəyyən addımların atılması zəruridir. Seçkilərdən sonra 685 bələdiyyə formalaşdırılacaq. Seçəcəyimiz bələdiyyə üzvləri cəmiyyətin qəbul etdiyi işgüzar, bacarıqlı, əhalisi tərəfindən sevilən insanlar olmalıdır”.

https://modern.az/aktual/504302/belediyyelere-subvensiyalarin-ayrilmasinda-sheffafliq-yoxdur/