TÜRK DÜNYASI BƏLƏDIYYƏLƏR BİRLİYİNİN İDARƏ HEYƏTİNİN NÖVBƏTİ TOPLANTISI KEÇİRİLİB

 Türk Dünyası Bələdiyyələr Birliyinin (TDBB) İdarə Heyətinin növbəti toplantısı Umraniyə bələdiyyəsinin ev sahibliyi ilə baş tutub.

Albaniya, Azərbaycan, Bosniya və Herseqovina, Qaqauziya, Qırğızıstan, Kuzey Kıprıs Türk Cumhuriyəti, Monqolustan, Özbəkistan və Türkiyədən idarə heyətinin üzvlərinin iştirak etdiyi iclasda ölkəmizi Azərbaycan Şəhər Bələdiyyələri Milli Assosiasiyasının və Nərimanov Bələdiyyəsinin sədri Təmraz Tağıyev və Azərbaycan Şəhər Bələdiyyələr Milli Assosiasiyasının məsul əməkdaşı Rövşən Məmmədov təmsil edib.

Tədbirdə giriş sözü ilə çixiş edən TDBB-nin Baş katibi Fəxri Çolak təşkilatın iyirmi illik yubiley ilindəki  fəaliyyətinə toxunaraq türk dilli ölkələrdə formalaşan yerli orqanların qarşılıqlı əlaqələrinin qurulmasında TDBB-nin  mühüm əhəmiyyətindən danışıb. Çıxışında TDBB-nin bugünədək həyata keçirdiyi layihələrə toxunaraq qarşılıqlı əməkdaşlığının daha da inkişaf etdirilməsinin zəruriliyi vurğulanıb.

Tədbirdə həmçinin TDBB-də ölkəmizi təmsil edən Azərbaycan Şəhər Bələdiyyələri Milli Assosiasiyasının və Nərimanov Bələdiyyəsinin sədri Təmraz Tağıyev də çıxış edərək  Türkiyə-Azərbaycan dostluğunun əsrlər boyu yaşayacağını, tarixi köklərlə bir birinə bağlı olan Türkiyə və Azərbaycan bütün münasibətlərini qardaşlıq prinsiplər əsasında qurulduğunu bildirib:

“Tarixi dostluq, qarşılıqlı etimad, səmimi münasibətlər, yüksək səviyyəli əməkdaşlıq əsasında qurulan Azərbaycan-Türkiyə əlaqələri daim möhkəmlənməkdədir. Ulu öndər Heydər Əliyev Azərbaycan-Türkiyə qardaşlıq münasibətlərinin inkişafına xüsusi əhəmiyyət verib. Ümummilli lider Heydər Əliyevin Türkiyə-Azərbaycan dostluğunun, qardaşlığının əbədi və daimi olduğunu təcəssüm etdirən “Biz bir millət, iki dövlətik” müdrik kəlamı bu gün də hər iki dövlətin vətəndaşları üçün örnəkdir. Prezident İlham Əliyevin türk dünyası haqqında bu sitatını xüsusi vurğulamaq istərdim: “Bizim Türkiyə ilə qardaşlıq əlaqələrimiz dayanıqlıdır və reallaşdırılan layihələr bunu təsdiqləyir: aramızdakı qardaşlıq, dostluq əbədi olacaq, XXI əsr türk dünyası əsri olacaq”. İki qardaş ölkə şad günündə də, kədərli günündə də bir birinin yanındadır.

44 gün davam edən Vətən müharibəsində Azərbaycan Türkiyənin mənəvi, diplomatik və siyasi dəstəyini hər zaman hiss etmişdir.  Azərbaycan və Türkiyə dostluğu dərindir sarsılmazdır və əbədidir.

Türk dilli ölkələrdə formalaşan yerli orqanların inkişafında, habelə müəyyən inkişaf səviyyəsinə çatmasında TDBB-nin xüsusi rolu var. Bundan sonrada Azərbaycan bələdiyyələri təşkilatın işində yaxından iştirak etməklə öz töhfəsini verməyə hazırdır.”

 İclasda idarə heyətinin digər üzvləri də çıxış edərək öz fikri və mülahizələri bölüşüblər. 

Belediyye.info