Səmərəli yerli özünüidarəetmənin qurulması və sakinlərin sosial-iqtisadi problemlərinin həlli bələdiyyələrin maliyyə imkanlarından birbaşa asılıdır. Bu imkanların genişləndirilməsində şəffaf, dəqiq və müasir vergi-uçot sisteminin mühüm rolu var. Bələdiyyənin inkişafı, ilk növbədə, vergi-uçot sisteminin hansı səviyyədə qurulmasından asılıdır.

Bu fikirləri Belediyye.infoya müsahibəsində Xəzər rayonu Şüvəlan bələdiyyəsinin Vergi xidmətinin rəhbəri Rizvan Rəhimov bildirib.

Rizvan Rəhimovun sözlərinə görə, bələdiyyədə müasir rəqəmsal prinsiplərə əsaslanan vergi-uçot sisteminin qurulması və Bələdiyyələrin Vahid İnformasiya Sisteminin imkanlarından səmərəli istifadə edilməsi büdcə daxilolmalarının artmasına müsbət təsir göstərib. Bunun nəticəsi olaraq, 2026-cı ilin ilk doqquz ayında Şüvəlan bələdiyyəsinin büdcə gəlirləri ötən ilin müvafiq dövrü ilə müqayisədə 68.8 faiz artıb.

Belə ki, cari ilin ilk doqquz ayında bələdiyyənin büdcə daxilolmalarının ümumi həcmi 226.920 manat təşkil edib. Müqayisə üçün qeyd edək ki, bu göstərici 2025-ci ilin eyni dövründə 128.968 manat, 2024-cü ilin ilk doqquz ayında isə 124.848 manat olub.

2026-cı ilin yanvar-sentyabr aylarında büdcəyə daxil olan vəsaitin 167.555 manatı əmlak vergisinin, 61.405 manatı isə torpaq vergisinin payına düşüb.

2025-ci ilin müvafiq dövründə əmlak vergisi üzrə daxilolmalar 94.831 manat, torpaq vergisi üzrə daxilolmalar isə 34.127 manat təşkil edib. 2024-cü ilin ilk doqquz ayında bu göstəricilər müvafiq olaraq 92.327 manat və 28 .520 manat olub.

Rəqəmlərdən də göründüyü kimi, 2026-cı ilin ilk doqquz ayında əmlak vergisi üzrə daxilolmalar ötən ilin eyni dövrü ilə müqayisədə 76,7 faiz, torpaq vergisi üzrə daxilolmalar isə 79 faiz artıb.

Rizvan Rəhimov bildirib ki, cari ilin sonunadək əsas hədəflərdən biri büdcə daxilolmalarını 300 min manat həddindən yuxarı çatdırmaqdır:

“Şüvəlan bələdiyyəsinin sədri Telman Süleymanovun qətiyyətli və sistemli fəaliyyəti sayəsində bu hədəfə nail olacağımıza inanırıq. Bu gün kollektivin hər bir üzvü büdcə daxilolmalarının artmasına öz töhfəsini verməyə çalışır. Əsas məqsədimiz mövcud imkanlardan səmərəli istifadə etmək, vergi daxilolmalarının artırılmasına nail olmaq və bələdiyyənin maliyyə potensialını daha da gücləndirməkdir”.

Vergi xidmətinin rəhbəri qeyd edib ki, torpaq və əmlak vergilərinin dəqiq uçotunun aparılması yerli büdcə daxilolmalarının artırılmasına, eləcə də bələdiyyənin maliyyə müstəqilliyinin möhkəmləndirilməsinə şərait yaradır. Eyni zamanda, vergi vəsaitlərinin təyinatı üzrə xərclənməsi barədə sakinlərin mütəmadi məlumatlandırılması bələdiyyəyə ictimai etimadı artırır və vergiödəmə mədəniyyətinin formalaşmasına müsbət təsir göstərir.

Onun sözlərinə görə, güclü vergi-uçot sistemi yalnız bələdiyyənin maliyyə imkanlarının genişlənməsinə deyil, həm də sakinlərə göstərilən xidmətlərin keyfiyyətinin yüksəldilməsinə xidmət edir.

Beləliklə, müasir rəqəmsal həllərin tətbiqi, vergi uçotunun düzgün təşkili və kollektivin birgə fəaliyyəti Şüvəlan bələdiyyəsinin büdcə gəlirlərinin artırılmasında mühüm rol oynayır.

Belediyye.info