Aprelin 16-da Ədliyyə Nazirliyinin Bələdiyyələrlə iş baş idarəsi tərəfindən Bakı şəhəri üzrə fəaliyyət göstərən bələdiyyələrin üzv və qulluqçuları üçün seminar-təlim təşkil olunub.

Videokonfrans formatında keçirilən təlim “Qəbiristanlıqların saxlanılması və abadlaşdırılmasına diqqətin artırılması” və “Qrant münasibətlərinin iştirakçısı kimi bələdiyyələrin səlahiyyətləri” mövzularını əhatə edib.

78 nəfərin iştirak etdiyi təlimdə Azərbaycan Respublikasının İnsan hüquqları üzrə müvəkkilinin (ombudsmanın) müstəqil monitorinq mexanizmi çərçivəsində Müvəkkilin aparatının və regional mərkəzlərinin əməkdaşları tərəfindən “Azərbaycan Respublikasında digər millətlərə və dinlərə mənsub şəxslərə aid qəbiristanlıqların mövcud vəziyyətinə dair” aparılmış monitorinq və onun nəticələri barədə məlumat verilib. Qəbiristanlıqların qorunması sahəsində öhdəliklər izah olunaraq bu istiqamətdə əhaliyə göstərilən xidmətin keyfiyyətinin artılmasının vacibliyi diqqətə çatdırılıb.

Daha sonra qranta, o cümlədən qrant müqavilələrinin (qərarlarının) qeydə alınmasına dair qanunvericiliyin tələbləri izah olunub, donor və resipiyent kimi bələdiyyələrin hüquqları və vəzifələri, məsuliyyəti, xarici donorlarla bağlı tələblər barədə məlumat verilib. Həmçinin qrant mexanizminin bələdiyyələrə institosional inkişaf baxımından yaratdığı imkanlar, dövlətin donor kimi çıxış etdiyi qrant münasibətlərin xüsusiyyətləri qeyd edilib.

Sonda mövzular üzrə iştirakçıların sualları cavablandırılıb və qarşılıqlı fikir mübadiləsi aparılıb.

 Ədliyyə Nazirliyi