Qəbələ rayonu Vəndam qəsəbəsində 20 Yanvar faciəsi qurbanlarının 35-ci ildönümü dərin ehtiramla yad edilib. Vəndam  bələdiyyəsinin təşkilatçılğı ilə keçirilən tədbirdə  qəsəbə nümayəndəliyinin rəsmiləri,  şəhid ailələri, qazilər və qəsəbə ictimaiyyəti iştirak edib. İştirakçılar qəsəbədəki Şəhidlər Abidəsini ziyarət edərək şəhidlərimizin xatirələrini ehtiramla yad ediblər.

Mərasim evində davam edən anım tədbirində Ümummilli Liderin və vətənimizin azadlığı uğrunda canından keçmiş bütün şəhidlərimizin əziz xatirəsi bir dəqiqəlik sükutla yad olunub.

Tədbirdə çıxış edən Vəndam qəsəbə bələdiyyəsinin sədri Asif Həşimov və qəsəbə ziyalıları çıxışlarında  bildiriblər ki, 20 Yanvar hadisəsi Azərbaycan xalqının azadlıq mücadiləsi idi. Ona görə də Sovet rəhbərliyi xalqımıza qarşı dəhşətli cinayət törədib və paytaxtımıza, o cümlədən respublikanın bir neçə ərazilərinə qoşun yeridərək əliyalın, azadlıq istəyən, günahsız soydaşlarımızı qətlə yetirib. 

Hadisələrin bilavasitə şahidi və içtirakçısı  olmuş bələdiyyə sədri Asif Həşimov çıxışında tədbir iştirakçılarına  20 Yanvar günü  Bakıda yaşananları, xalqın bir yumruq tək birləşdiyini tədbir iştirakçılarına çatdırmışdır. Məhz ümumxalq birliyin sayəsində bu gün Ali Baş Komandan İlham Əliyevin sərkərdəliyi ilə torpaqlarımız erməni tapdağından azad olundu.      

Tədbirdə bildirilib ki, faciədən dərhal sonra xalqımızın Ümummilli Lideri Heydər Əliyev siyasi iradə nümunəsi göstərib, 1990-cı il yanvarın 21-də həyatını təhlükə qarşısında qoyaraq Azərbaycanın Moskvadakı Daimi Nümayəndəliyinə gələrək qanlı faciənin təşkilatçılarını dünya ictimaiyyəti qarşısında ittiham edib, cəsarətli bəyanat verərək əliyalın xalqın qırılmasını yol verilmiş kobud siyasi səhv kimi ifşa edib. Məhz Ümummilli Liderin sayəsində 20 Yanvar faciəsinin başvermə səbəbləri və günahkarlar üzə çıxıb.

Qeyd olunub ki, Ulu Öndər Heydər Əliyevin yolunu uğurla davam etdirən Azərbaycan Respublikasının Prezidenti cənab İlham Əliyev də şəhidlərin xatirəsinin uca tutulmasına, şəhid ailələrinin sosial məsələlərinin həll olunmasına xüsusi diqqət ayırır. Dövlət başçısının təşəbbüsləri sayəsində 20 Yanvar hadisələri ilə əlaqədar əlilliyi olan şəxslər və şəhid ailələri üçün effektiv sosial müdafiə sistemi formalaşıb.

Daha sonra çıxış edən natiqlər şəhid ailələri ölkəmizdə şəhid ailələrinə və qazilərə göstərilən diqqət və qayğını yüksək qiymətləndirdiklərini vurğulayaraq Azərbaycan Respublikasının Prezidenti cənab İlham Əliyevə və Azərbaycan Respublikasının Birinci Vitse-Prezidenti Mehriban xanım Əliyevaya təşəkkürlərini bildiriblər.

Vəndam bələdiyyəsi  tərəfindən 20 yanvar şəhidlərinin  əziz xatirəsinə qəsəbədən olan şəhid ailələrinin üzvlərinə ehsan süfrəsi açılıb. 

Belediyye.info