Xəzər rayonu Mərdəkan bələdiyyəsi tərəfindən 06 oktyabr 2023-cü il tarixində qəsəbədə yerləşən H.Z.Tağıyev adına 123, 183 nömrəli tam orta məktəblərin və S.Rüstəm  adına Xarici Dillər Təmaüllü Gimnaziyanın yuxarı sinif şagirdləri arasında Heydər Əliyev – “Müstəqilliyimiz əbədidir” mövzusunda məktəblərarası inşa yazı müsabiqəsinə yekun vuruldu. 

Tədbirdə bələdiyyə üzvləri, Xəzər RİHB-nın Mərdəkan qəsəbəsi üzrə Nümayəndəsi, məktəb müəllimləri iştirak etdilər.

Mərdəkan bələdiyyəsinin sədr müavini tədbiri açıq elan etdi və Ümummilli Lider Heydər Əliyevin əziz xatirəsi ehtiramla yad edildi. 

Daha sonra Əbədiyaşar Liderimizlə bağlı qeyd etdi ki, hər xalqın seçilən və sevilən, həyatın ən ağır anlarından ona yol göstərən, tarixi dönüşlər zamanı, düzgün istiqamət verərək onu büdrəməkdən xilas edən böyük şəxsiyyətləri olur. Belə şəxsiyyətlər gördüyü misilsiz işlərlə xalqının varlığını,mövcudluğunu əbədiləşdirdiyinə, onun gələcək inkişaf yollarını, digər millət və dövlətlər arasında yerini, mövqeyini müəyyənləşdirdiyinə görə, xalqın əbədi qürur mənbəyinə çevrilir. İllər keçdikcə belə insanların qeyri-adiliyi və onların ideyalarının əbədiyaşarlığı dönə-dönə öz təsdiqini tapır və bu ideyalar bütün nəsillərə örnək olur, onları daha böyük quruculuq işlərinə ruhlandırır. Xalqımızın da zaman-zaman belə tarixi şəxsiyyətləri olmuş və məhz onların sayəsində bu gün Azərbaycan müstəqil dövlətlər sırasında öz layiqli yerini tuta bilmişdir. İndi Azərbaycan böyük əzab-əziyyət və tökdüyü qanlar hesabına bərpa etdiyi müstəqilliyi gündən-günə möhkəmləndirməklə yanaşı, dünya iqtisadiyyatına, mədəniyyətinə öz töhfələrini verir, nüfuzlu beynəlxalq təşkilatlarda ləyaqətlə təmsil olunur.

XX əsrdə Azərbaycanın taleyinə uca Tanrının qisməti kimi göndərilən belə şəxsiyyətlərdən biri də tariximizin şərəfli səhifələrini yazmış dünya səviyyəli, müdrük siyasi xadim, vətənpərvər, xalqımızın böyük oğlu Heydər Əliyev olmuşdur. Bu il 100 illiyini dərin ehtiramla qeyd etdiyimiz Ulu Öndərin keçdiyi həyat yolu hər bir azərbaycanlı üçün əbədi örnəkdir. Çünki bu böyük şəxsiyyətin milləti, ölkə və dövləti, bütövlikdə isə, Vətəni naminə gördüyü misilsiz işləri sadalamaqla qurtarmaz. Vətənini bütün varlığı ilə sevən və həyatını millətinə həsr edən bir şəxs kimi xalqımızın Ümummilli Liderinin Mən həmişə fəxr etmişəm, bu gün də fəxr edirəm ki, “Mən Azərbaycanlıyam” sözləri Dünya Azərbaycanlıların şüarı olmaqla, soydaşlarımızın həmrəyliyinin təməl daşına çevrilmişdir.

Tədbirdə inşa yazı müsabiqəsinin qaliblərinə Mərdəkan bələdiyyəsi tərəfindən “Diplomlar”  təqdim edilmişdir.

Hər üç məktəbin I yeri tutmuş şagirdləri arasından inşa yazının çox məzmunlu və geniş əhatə olunduğuna görə, I yerə H.Z.Tağıyev adına 123 nömrəli tam orta məktəb, II yerə S.Rüstəm adına Xarici Dillər Təmaüllü Gimnaziya, III yerə isə, 183 nömrəli tam orta məktəb layiq görülmüşdür.

Məktəblər Kubokla mükafatlandırılmışdır.