Azərbaycan bələdiyyələrinin fəaliyyətinin artıq 25-ci ili tamam olur. Bu 25 il ərzində Azərbaycan bələdiyyəsi müəyyən inkişaf yolu keçib. Söz yox ki, bu inkişaf yolu çətinliklərlə və neqativlərlə dolu olub. Bələdiyyələrin fəaliyyətinin ilk 15 ili ərzində məsuliyyətsiz və bacarıqsız insanların seçilməsi, icra hakimiyyəti nümayəndələrinin bələdiyyələrə ciddi nüfuz etməsinin nəticəsində neqativ hallara çox rast gəlinib.

Bu neqativ halların çox olmasının nəticəsində Azərbaycan bələdiyyəsi bu gün "torpaq satan" adını üstündən ata bilməyib. Buna görə də müzakirələr bəzən bələdiyyələrin üzərindən olur.

Əslində isə son 10 il ərzində Azərbaycan bələdiyyələri vətəndaşlara yüksək səviyyədə xidmət göstərib və göstərməkdədir. İstər şəhid və qazilər ailələrinə, istərsə də sosial layihələrin icra edilməsində, istərsə də digər məqamlarda öz sözünü deyib.

BiG.AZ-a açıqlamasında Bələdiyyələrin fəaliyyətinin təbliği ictimai birliyinin sədriVüqar Tofiqli bildirib.

O, qeyd edib ki, bütün prosesləri araşdırdığımızda görürük ki, Azərbaycan bələdiyyəsi müəyyən uğurlara imza atsa da, daimi çətinliklərlə üz-üzə qalıb. Bu çətinliklərin aradan qalxmasında dövlət və hökumət rəsmiləri bir sıra planların icrasına başlayıb. Bu planlardan biri də bələdiyyələrin birləşdirilməsidir. Bələdiyyə sayının 685 olması Azərbaycan kimi bir ölkə üçün çoxdur. Güman edirəm ki, bu proses növbəti illərdə də həyata keçirilməlidir:

Bəs bu birləşdirilmələr bələdiyyələrə nə verə bilər?

Birinci növbədə maliyyə sisteminin birləşməsi və təmərküzləşməsinə, əldə edilən vəsaitin artmasına səbəb ola bilər. İkinci növbədə isə xərclərin azalmasına səbəb ola bilər. Bu mənada bələdiyyələrin birləşdirilməsi gündəm mövzusu olmalıdır.

Məsələnin başqa bir tərəfi də ondadır ki, Azərbaycanda bələdiyyələr birpilləli sistemlə fəaliyyət göstərir. Bəzi problemlər məhz buradan qaynaqlanır. Bizim bələdiyyə sistemimiz bütün dünyada qəbul edilmiş formada olsaydı, vətəndaşın mövqeyi başqa cür ola bilərdi.

Bizdə ucqar dağ kəndinə seçilmiş bələdiyyə sədri və üzvləri ilə Bakı şəhərində 30 mindən çox səslə seçilmiş bələdiyyə sədri arasında heç bir fərq yoxdur. Dünya bələdiyyə qaydalarında iki və üç  pilləli sistem tətbiq edilir və qeyd edilən şəxslərin arasında hüquq fərqliliyi olur. Onların fəaliyyəti bir-birindən fərqlənir.

Birləşdirilmələrin həyata keçirilməsi bələdiyyələrin nüfuzunun yüksəlməsinə, cəmiyyətdə nüfuzunun artmasına müəyyən mənada təsir edəcək.

Ümumilikdə isə biz əgər bələdiyyə sisteminin inkişafını və cəmiyyətdə rolunu artırmaq istəyiriksə, bələdiyyələrə geniş müstəvidə şərait yaratmalı və bələdiyyələrə verilən səlahiyyətləri əllərindən almamalıyıq. Təəssüf ki, bir neçə istiqamətdə bələdiyyə büdcələrinə yönəldilmiş maliyyə, vergi və rüsumların bir neçəsi bələdiyyələrdən alınaraq dövlət büdcəsinə yönəldilib.

Qanunvericiliyə görə, bələdiyyələrdən alınan vergilərin müəyyən faizi yenidən bələdiyyə hesabına keçirilməlidir. Təəssüf ki, köçürmə prosesində boşluqlar bələdiyyə büdcələrinə aid maliyyənin aidiyyəti üzrə ödənilməməsinə səbəb olur. Nəticədə isə bu kimi hallar bələdiyyələrin cəmiyyət arasındakı nüfuzuna da təsir göstərir. Vətəndaşın müraciətini bələdiyyələr operativ şəkildə icra edə bilmir.

Bəzən "Bələdiyyələr ləğv edilməlidir" kimi cəmiyyətdə fikirlər formalaşır. Təəssüf ki, bu fikri səsləndirən vətəndaşlar bələdiyyəyə vergi verməkdən yayınan şəxslərdir. Bələdiyyə vətəndaş münasibətlərinin tənzimlənməsi, bələdiyyə, icra və icraedici orqanların qarşılıqlı münasibətlərinin tənzimlənməsi məsələsində böyük problemlər var. Buna görə də bələdiyyələr cəmiyyətdə qazanmalı olduğu nüfuzu əldə edə bilmir. Nəticədə də cəmiyyətdə bələdiyyələr haqqında neqativ fikirlər formalaşır.

Düşünürəm ki, bələdiyyələrin birləşməsindən sonra onların fəaliyyəti üçün daha sivil şərait yaradılacaq. Bütün problemlər kompleks şəkildə öz həllini tapacaqdır".

https://big.az/550628-belediyyelerin-birlesmesinden-sonra-onlarin-fealiyyeti-ucun-daha-sivil-serait-yaradilacaq-vuqar-tofiqli.html