Xocəsən bələdiyyəsinin başlıca məqsədi əhalinin həyat səviyyəsinin yaxşılaşdırılmasına, vətəndaşların məmnunluğunun təmin edilməsinə tövhə verməyə çalışmaqdır. Vətəndaş məmnunluğunu rəhbər tutaraq, hər zaman sakinlərin problemlərini dinləmək, onların qayğıları ilə maraqlanmaq bələdiyyənin əsas meyarıdır.

İlin əvvəlində Xocəsən bələdiyyəsinin iş planı təsdiq edilmişdir, hər ay ümumi iclaslar keçirilərək, iclaslarda baxılmış məsələlərlə bağlı qərarlar qəbul edilmiş və icrası təmin edilmişdir. Müzakirə olunmuş məsələlər arasında sosial-iqtisadi, maliyyə, təmir tikinti və abadlıq işləri, vətəndaşlardan daxil olan müraciətlər olmuşdur. Xocəsən bələdiyyəsi tərəfindən hesabat ilində 34 iclas keçirilmiş və 134 qərar qəbul edilmişdir. “Bələdiyyələrin fəaliyyətinə inzibati nəzarət haqqında” Qanunun müvafiq bəndlərinə uyğun olaraq protokollar Ədliyyə Nazirliyi Bələdiyyələrdə İş Baş idarəsinə göndərilmişdir.

Hesabat dövründə bələdiyyənin fəaliyyətində büdcənin formalaşmasına və icra olunmasına xüsusi diqqət yetirilib. Real gəlirlər proqnozlaşdırılaraq, onlara uyğun xərclər nəzərdə tutulmuşdur. Vətəndaşlardan əmlak və torpaq vergilərinin yığılması zamanı vergi ödəyiciləri arasında mövcud qanunlar barədə təbliğat işləri aparılır. Vergidən yayınanlara qarşı xəbərdarlıq etməklə tədbirlər görülmüşdür. Mövcud Qanunvericiliyə uyğun İcra şöbəsinə 100-dən artıq vergi ödəyicisi barədə müraciət olunmuşdur. Lakin həmin sənədlər İcra şöbəsi tərəfindən geri qaytarılmışdır. Vergi ödəyiciləri ilə işin təkmilləşdirilməsi məqsədilə AR Ədliyyə Nazirliyi tərəfindən İcra sənədlərinin məcburi icraya yönəldilməsi ilə bağlı inteqrasiya imkanları olmayan qurumlar üçün electron cabinet yaradılmışdır. Elektron kabinetin yaradılması bələdiyyələrin vergi ödəyicilərinin vergiyə cəlb edilməsi işini xeylı asanlaşdıracaqdır. Eyni zamanda bələdiyyə tərəfindən, bələdiyyə və vətəndaş münasibətlərinə xələl gəlməsinin qarşısını almaq məqsədi ilə bələdiyyənin qərarı ilə “İcra orqanları və problemli vergi ödəyiciləri ilə iş” şöbəsi təsis edilmişdir. Şöbənin yaradılması öz effektini göstərmişdir.

Hazırda bələdiyyənin inzibati ərazisində 15703 vergi obyekti mövcuddur. Vergi ödəyicilərindən hesabat dövründə 7.280 nəfər ödəyici vergiyə cəlb olunmuşdur. 2025-ci ildə bələdiyyə büdcəsinə 342259 manat gəlir daxil olmuş, xərclər isə 340312 manat təşkil etmişdir. Büdcə gəlirlərinin əsas mənbəyi olan torpaq vergisindən 35.273 manat, əmlak vergisindən 279.936 manat, icarə haqqı 1050 manat daxil olmuşdur.

Bələdiyyənin büdcəsinə daxil olmalar,  Azərbaycan Respublikasının Vergi Məcəlləsinə və bələdiyyənin qəbul etdiyi qərarlara əsasən hesablanır. Bələdiyyə büdcəsinə daxil olmuş vəsaitlər aşağıdakı isdiqamətdə xərclənmişdir: Daimi əsaslarla bələdiyyədə çalışan bələdiyyə üzvlərinin və qulluqçularının əmək haqqı 191135 manat, Dövlət Sosial Müdafiə Fondu, İcbari Tibbi Sığorta və işsizlikdən sığorta haqlarına görə 55976 manat, yerli özünü idarəetmə orqanının saxlanması xərclərindən təsərrüfat mallarının və inventarların alınması üçün 6042 manat, sair xərclərə görə  8416 manat, sosial yardımlar üzrə ödənişlər  4295 manat, mədəni kütləvi bayram tədbirlərinin təşkili üçün 7992 manat, abadlıq, quruculuq, təmir işlərinə  43046 manat xərclənmişdir.

Hesabat ilində Binəqədi Rayon İcra Hakimiyyətinin və Xocəsən bələdiyyəsinin qarşılıqlı fəaliyyəti nəticəsində vətəndaşların gediş-gəlişinə xüsusən payız-qış mövsümündə yaranan problemlərin aradan qaldırılması istiqamətində küçə və yolların təmiri tədbirləri həyata keçirilmişdir. Belə ki, Xocəsən bələdiyyəsinin inzibati ərazisində Ruslan Allahverdiyev küçəsinin 400 metr məsafəsində su və tullantı sularının axıdılması sistemi yenidən qurularaq, istifadəyə verilmiş, yeni asfalt-beton örtüyü döşənmişdir. Həmçinin qəsəbənin Yovşanlı (220 m), Çaylı küçəsi 1-ci döngə (320 m), Şəfəq (350 m), Aprel Zəfəri küçəsi 12-ci döngə, 28 May qəsəbəsində 8 Mart (320 m) və Qarabağ küçələrində asfaltlanma işləri aparılmışdır. 28 May qəsəbəsi 22-ci küçəsində yol örtüyünün vəziyyəti qənaətbəxş olmadığına görə küçə çınqıl örtüyü ilə bağlanmışdır.

Sakinlərin müraciətini nəzərə alaraq, Sulutəpə qəsəbəsi 20 Yanvar və Əskipara 1-ci döngədə yararsız küçə işıqları təmir edilərək, bərpa edilmişdir. Qəsəbənin mərkəzi küçəsi olan Xocalı küçəsində fəaliyyət göstərən obyekt və fərdi yaşayış evlərinin fasadları əsaslı şəkildə təmir edilərək, müasirləşdirilmişdir. Beynəlxalq Avtovağzal Kompleksinin balansında olan, baxımsızlıqdan acınacaqlı vəziyyətə düşən parkda əsaslı abadlıq, bərpa və təmir işləri aparılmış, vətəndaşların istirahəti üçün qurulmuş oturacaqlar bərpa edilərək, əvvəlki vəziyyətinə gətirilmiş, alaq otları təmizlənmiş, yaşıllıqlara aqrotexniki qulluq göstərilərək, Avtovağzal rəhbərliyinə təhvil verilmişdir.

 Sulutəpə yaşayış massivi Çinarlı və Qafqaz küçələrində intensiv yağıntı zamanı yağıntı suları kanalizasiya xətti olmadığına görə fərdi yaşayış evlərinə dolurdu. Nəhayət 2025-ci ildə bu məsələ də öz həllini tapmışdır. Bələdiyyə tərəfindən “İri Şəhərlərin Birləşmiş Su Təchizatı Xidməti” PHŞ-nin rəhbərliyinə müraciətdən sonra ərazi layihələndirilərək, texniki şərt alınmışdır. Tullantı sularının kənarlaşdırılması üçün diametri 300 mm, uzunluğu 150 p/m olan 12 000,00 manat həcmində kanalizasiya kollektorunun bələdiyyənin maliyyəsi hesabına inşa olunmasına razılıq alınmışdır. Podratçı təşkilatla müqavilə bağlanılmış və işlər görülərək, tamamlanmışdır. Hər iki küçədə yaşayan sakinlərimizin uzun müddət onları narahat edən problemləri həll olunmuşdur.

Qırmızı Bayraq Ordenli Şəhid Dinar Mustafayevin adını daşıyan küçədə ümumi abadlıq işləri aparılmış, küçənin asfalt örtüyü yenilənmişdir.

Hesabat dövründə ərazidə yaşıllıqların artırılmasına, ətraf mühitin sağlamlaşdırılmasına xüsusi əhəmiyyət verilmiş və ağacəkmə aksiyaları təşkil edilmişdir. Şamaxı-Bakı magistral yoluna paralel yerləşən Pepsi-Colanın qarşısında olan antisanitar vəziyyətin qarşısını almaq məqsədi ilə 200 ədəd Kiparis növlü ağac alınaraq, yaşıllıq zonası yaradılmışdır. Hesabat ilində Xocəsən Yeni Yaşayış massivində 50 ədəd ağac, “Konstitusiya və Suverenlik ili” çərçivəsində Ümumilli Lider Heydər Əliyevin anadan olmasının 102-ci il dönümünə həsr olunmuş ağacəkmə aksiyası zamanı FHN Dövlət Yanğın Nəzarət Xidmətinin iştirakı ilə 300 ədəd müxtəlif növ ağac əkilmişdir.

Xocəsən Yeni Yaşayış massivində yaşayan Şəhid və Qazi ailələrinin istirahət vaxtlarının səmərəli keçirilməsi üçün ərazidə istirahət parkının salınması ilə bağlı bələdiyyə tərəfindən Rayon İcra Hakimiyyətinə müraciət edilmiş, müraciət müsbət qarşılanmışdır.

1.5 ha ərazini əhatə edən sahədə podratçı təşkilat olan SOCAR Midstream Gas Operations və onun Cənub Qafqaz Boru Kəməri üzrə tərəfdaşlarının təşkilatçılığı ilə “Şəhər meşələri: Ağacdan daha artıq” layihəsi çərçivəsində geniş park salınmışdır. Parkda ümumilikdə 6600 ədəd ağac əkilmiş, uşaq əyləncə elementləri yerləşdirilmiş, damcı suvarma sistemi quraşdırılmış, velosiped və piyadaların hərəkəti üçün hərəkət zolaqları salınmış, söhbətgah və oturacaqlar quraşdırılmışdır.

Hesabat ilində 11saylı Regional Ekologiya və Təbii Sərvətlər  İdarəsinin əməkdaşları ilə birgə bir neçə tədbir keçirilmişdir. “Konstitusiya və Suverenlik ilinə” həsr olunmuş ağacəkmə kampaniyası keçirilmiş, məktəb şagirdlərinə “Plastik və Polietilen qablaşdırma tullantılarının ətraf mühitə və insan sağlamlığına mənfi təsirləri” və s.  mövzularında ekoloji maarifləndirici tədbirlər keçirilmişdir.

Hesabat ilində Xocəsən bələdiyyəsi tərəfindən ərazidə yaşayan Şəhid və Qazi ailələri, Qarabağ Müharibəsi əlilləri və aztəminatlı ailələr daima diqqət mərkəzində saxlanılaraq, sosial yardımlar göstərilmişdir. Sosial yardımlar şəklində ərzaq bağlamarı şəklində “Novruz bayramı ” münasibəti ilə qəsəbədə yaşayan 35 ailəyə 1200,00 manat, müqəddəs “ Ramazan bayramı ” münasibəti ilə 28 ailəyə 1050,00 manat, “ Qurban bayramı ” münasibəti ilə 25 ailəyə 1000,00 manat, aztəminatlı və sosial yardıma ehtiyacı olan ailələrə 1359.60 manat, “Anım günü” münasibəti ilə şəhid ailələrinə 700,00 manat məbləğində yardım göstərilib. Şəhid və Qazi ailələrinin övladlarına 636,00 manat olmaqla, 12 dəst yay və qış məktəbli forması alınmışdır.

Hesabat ilində bələdiyyə “Sağlam bədəndə sağlam ruh olar” devizini əsas tutaraq, ərazidə fəaliyyət göstərən məktəb şagirdləri arasında Ümumilli Lider Heydər Əliyevin anadan olmasının 102-ci il dönümünə həsr olunmuş, mini-futbol yarışı keçirilmişdir. Qaliblər kubok, medal və pul mükafatları ilə mükafatlandırılmışdır. Gənclər arasında U-15 və U-17 Avropa çempionatının qalibi olmuş şagird idmançılarla bələdiyyədə görüş keçirilmiş, onlara qiymətli hədiyyələr təqdim edilmişdir. Xocəsən bələdiyyəsi əhalinin sağlamlığının qorunması və tibbi xidmətinin yaxşılaşdırılması üçün mühüm addımlar atmışdır. Bunlardan, Akademik Zərifə Əliyeva adına Milli Oftolmologiya Mərkəzinin Avtomobil Səyyar Klinikasının növbəti tibbi aksiyası Xocəsən Yeni Yaşayış massivində təşkil edilmişdir. Aksiya zamanı 100 nəfərdən artıq insan oftolmoloji müayinə olunmuşdur. Həmçinin Binəqədi Rayon İcra Hakimiyyəti və Xocəsən bələdiyyəsinin birgə təşəbbüsü ilə Azərbaycan Tibb Universitetinin Tədris Stomotoloji Klinikası tərəfindən xidmətlərin əlçatanlığını artırmaq və ağız-diş sağlamlığı sahəsində maarifləndirməni gücləndirmək məqsədi ilə Xocəsən bələdiyyəsinin inzibati binasında və Xocəsən Yeni Yaşayış massivində səyyar tibbi aksiya keçirilmişdir.

 Xocəsən bələdiyyəsində vətəndaşların qəbulu və müraciətləri də daim diqqət mərkəzində saxlanılır. Təhlil göstərir ki, il ərzində vətəndaşlardan daxil olmuş 1780 Müraciət qeyd edilən məsələlərə aid olunub:

•Torpaq sahələrinin olub-olmaması barədə - 141;

•Maddi yardım – 46;

•Dəfnlə bağlı Dövlət Sosial Müdafiə Fonduna Arayışlar-148;

•Digər məsələlər üzrə-1445.

Müraciətlərin hər birinə baxılaraq qanunvericiliyin tələblərinə uyğun olaraq, cavab verilmişdir. Hesabat dövründə ayrı-ayrı təşkilatlardan daxil olmuş 326 məktub, müraciət, sərəncam və digər sənədlər əksər hallarda qanunvericilikdə nəzərdə tutulmuş müddətdə baxılmış və cavablandırılmışdır. Bələdiyyədə “ Qaynar xətt ” fəaliyyət göstərir (012-346-04-02). Gün ərzində qaynar xətt vasitəsi ilə daxil olan şikayət və müraciətlər qeydə alınır, aidiyyəti şöbələrə çatdırılır və tədbirlər görülür. Bayram günləri “Qaynar xətt” də növbətçilik qrafiki üzrə məsul işçilər müraciətləri qəbul edirlər.

Hesabat ilində bələdiyyənin sədri tərəfindən 183 nəfər, ümumilikdə 1944 nəfər vətəndaş qəbul edilmişdir. Xocəsən bələdiyyəsi il ərzində bir çox tədbirlərdə iştirak etmişdir. 20 Yanvar Ümumxalq hüzn günü münasibəti ilə Şəhidlər Xiyabanı ziyarət edilmişdir. 26 Fevral Xocalı faciəsinin 33-cü ildönümü, 10 May Ulu Öndər Heydər Əliyevin anadan olmasının 102-ci ildönümü, 8 Noyabr Zəfər Günü, Ulu Öndər Heydər Əliyevin Anım günü münasibəti ilə bir sıra silsilə tədbirlər keçirilmişdir. İl ərzində Şəhidlərin  Anım və doğum günləri Fəxri Xiyabanda və Sulutəpə Şəhidlər Xiyabanında yad edilmişdir. İl ərzində Xocəsən bələdiyyəsi, inzibati ərazisində vətəndaşlarla görüşlər keçirərək, görülən işlər barədə hesabatlar vermiş, həmçinin hesabat internet saytları vasitəsi ilə çatdırılmışdır.

Xocəsən bələdiyyəsi olaraq 2026-cı ildə qəsəbənin bütün fəal və sağlam qüvvələrini öz ətrafına toplayaraq, nəzərdə tutulan vəzifələrin icrasını təmin etmək üçün bütün səy və bacarığımızı səfərbər edəcək və işimizi günün tələbləri səviyyəsində qurmağa çalışacağıq.

Nigar Məmmədova

Binəqədi rayonu, Xocasən bələdiyyəsinin sədri