“Zaqatala bələdiyyəsi seçicilərinin etimadını doğrultmaq üçün var qüvvəsiylə çalışır”- bu fikri Zaqatala bələdiyyəsinin sədri Nurəli Əhmədov “Bələdiyyələrin fəaliyyətinin təbliği” İctimai birliyinin  sədri Vüqar Tofiqli ilə görüşdə bildirib.

Bələdiyyə sədri görüşdə bildirib ki, Zaqatala şəhərində ətraf mühitin mühafizəsi üçün bələdiyyə tərəfindən maraq doğuran layihələr icra edilməkdədir. Ancaq maliyyə imkanları kifayət etmədiyindən bu sahədə bir qədər problemlərimiz olur. Hazırda ərazidə olan əmlak və torpaq vergisinin yığımında, o cümlədən mehmanxana rüsümlarının yığımında hər hansı problemlə üzləşmirik.

Ciddi fikri mübadiləsi aparılan görüşdə Muxax bələdiyyəsinin sədri Elvin Yusifov və Muxax bələdiyyəsinin şöbə müdiri Salam Əliyevdə iştirak edib.

Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi ilə həyata keçirilən  “Ətraf mühitin qorunması istiqamətində bələdiyyələrin fəaliyyətinin artırılması” layihəsi çərçivəsində Zaqatala  bələdiyyə sədrlərinin iştirakıyla keçirilən görüşdən əvvəl bir sıra bələdiyyələrdə fərdi şəkildə görüşlərin keçirildiyini qeyd edən birlik sədri qeyd edib ki, Zaqatala rayonunda formalaşan 23 bələdiyyənin hər biri sosial medianın verdiyi imkandan yararlanması ürəkaçan məqamdır. Ən maraqlısı isə ondadır ki, onlar hər bir addımlarını, habelə həyata keçirdikləri layihələri ictimailəşdirməkdə maraqlı görünürlər. Fəaliyyətin ictimailəşdirilməsi, fəaliyyətləri təbliğ olunması, seçicilərinə daim hesabat verilməsi bələdiyyələrin seçicilərin qarşısındakı nüfuzuna da müsbət təsir göstərməkdədir. Zaqatala bələdiyyələrinin büdcə gərlirlərinin qonşu bələdiyyələrdən fərqlənməsi bir daha göstərir ki, rayonda bələdiyyə-icra münasibətləri düzgün istiqamətdə qurulub. Lakin bu münasibətlər sivil şəkildə qurulsa da bələdiyyələrin əmlakla bağlı ciddi problemlərinin olması məyusedici faktdır.

Görüş iştirakçıları bələdiyyələrin torpaqla bağlı sənədləşdirmə prosesindən hədsiz dərəcədə bürokratik əngəllərlə müşayiət olunmasını, bu günədək rayon bələdiyyələrinə xəritələrinin verilməməsi, hableə mülkiyyətə torpaq və əmlakın verilməməsindən narazılıqlarını ifadə etməklə onun həll edilməsi üçün daha ciddi addımların atılmasını zəruri hesab ediblər.     

Bələdiyyənin inzibati binasında keçirilən görüşdə bələdiyyə sədri Nurəli Əhmədov  bələdiyyənin fəaliyyətindən, bələdiyyənin əldə etdiyi nailiyyətlərə də toxunub. 

Görüşdə ikitərəfli əməkdaşlıq əlaqələrinin genişləndilməsi,  həyata keçirilən layihələrin ictimailəşdirilməsinə dəstək göstərilməsi qərara alnıb.

Belediyye.info