Sosial media platformalarının müsbət tərəflərindən biri də izləyicilər arasında məsafə anlayışını aradan qaldırmaqla yeni ünsiyyət formasını yarada bilməsidir. Artıq bir çox hallarda məndə media sahəsi ilə sıx bağlı olduğumdan ən yeni məlumatları həm də  bu platformalardan alır və bələdiyyə sahəsi ilə bağlı  maraq doğuran bütün məsələləri də ilk olaraq məhz burada paylaşıram. Bu səbəbdən də  dostluğumda olanların da böyük əksəriyyəti bu cameənin insanlarıdır.

Bələdiyyə üzv və qulluqçularının böyük əksəriyyəti paylaşılan məlumatları oxuyub müəyyən mənada yararlansalar da,  onu paylaşmağa və bəyənməyə hələki üstünlük vermirlər. Ola bilsin nədənsə və ya kimdənsə  ehtiyat edirlər. Ola bilər.  İnanıram ki, bu da zamanla öz axarına düşər. Mətləbdən uzaqlaşmayım.

Beləliklə, bu yaxınlarda mənə edilən müraciət diqqətimi çəkdiyindən dərhal reaksiya verdim. Ümumiyyətlə, edilən müraciətlərə anındaca reaksiya verməklə hər bir müraciətə diqqətlə yanaşır və bacardığım qədər hər kəsə  dəstəyimi göstərməyi özümə borc bilirəm. Ancaq bu müraciət diqqətimi daha çox  ona gorə çəkdi ki, o uzaq İsvec dövlətində yaşayan həmyerlimiz Turan Əliyev tərəfindən edilmişdi:

“Mən sizə İsveçdən yazıram. Mən burada şəhər bələdiyyə məçlisinə 2 ci mandatdır seçilmişəm. 40 minlik şəhər bələdiyyəsinin idarə heyatinin üzvüyəm. Bir çox komitələrdə partiyanı təmsil edirəm. Məhkəmə sistemində də juri olaraq fəaliyyət göstərirəm. Bələdiyyə seçkiləri ilə əlaqədar lazım olsa internet resursunuzda müsahibəyə hər zaman hazir olduğumu bildirmək üçün yazdım. Hörmətlə Turan Əliyev İsveç”

Beləkilə, belə fursəti əldən buraxmaq olmazdı. Odur ki, ilkin olaraq özü haqqında bir qədər geniş məlumat əldə etdim:

Turan Əliyev - 1983-cü ildə Naxçıvan şəhərinin, Qaraxanbəyli kəndində ziyalı ailəsində anadan olub. Naxçıvan Dövlət Universitetində yol hərəkətinin təşkili və istismarı ixtisası üzrə təhsil alıb.  Sonradan səhhəti ilə əlaqədar İsveçə köçüb. Bu ölkədə ilk əvvəl diaspora fəaliyyətinə qoşulub. Sonradan siyasi fəaliyyətə marağı artdığından  “Mərkəz”  partiyasında fəal siyasətə qoşulub.

İki dəfə ölkə və region parlamentinə namizədliyi  qeydə alınıb, seçkilərdə fəal iştrak edib. Hazırda İsveçdə ikinci mandatdır ki, Partille şəhər bələdiyyə məclisinin üzvü kimi fəaliyyət göstərir. Bu vəzifəyə seçilməkdə məqsədi cəmiyyətə fayda vermək və yerli idarəetmədə əcnəbi icmaların səsini eşitdirmək olub.

Özü haqda daha sonra qeyd edir:

- Hazırda üzv seçildiyim  bələdiyyədə mən tikinti və ətraf mühit komitəsi, mədəniyyət və seçki komitəsində üzv olduğum partiyanı təmsil edirəm və bələdiyyə surasının (idarə heyətinin) üzvüyəm. Partille  şəhər bələdiyyəsi təxminən 40 min nəfərlik əhalisi olan bir bölgəni idarə edir və burada 3000-ə yaxın bələdiyyə qulluqçusu fəaliyyət göstərir. Bələdiyyə üzvü kimi mənim fəaliyyətim cəmiyyətin müxtəlif sahələrində inkişafı dəstəkləməkdir.

“Maraqlıdır, İsveç  ölkəsində bələdiyyə sistemi necə qurulub”- sualıma həmsöhbətim belə cavab verir

- İsveçdə bələdiyyə sistemi demokratik idarəetmə prinsiplərinə əsaslanır. İki pilləlidir. Birinci pillə bələdiyyə adlanır. İsveçdə hazırda 290 bələdiyyə secki yolu fomalaşdırlıb. Bu pillədə formalaşdırılan bələdiyyələr əsasən təhsil (uşaq bağçaları və məktəblər), sosial xidmətlər, səhiyyə, tikinti və planlaşdırma, zibil və tullantıların təkrar emalı, mədəniyyət və  mədəni istirahət məsələrinə cavabdehdirlər.

Bələdiyyə sisteminin ikinci pilləsi isə region adlanır. Onların sayı okədə 21-dir. Bu qurumlar isə daha böyük sahələrə - regional inkişaf, ekologiya, nəqliyyat və bir sıra digər sahələrə  cavabdehlik daşıyırlar.

Bu qurumlara seçkilər dörd ildənbir keçirilir. Seçki prosesində həm bələdiyyə və region şuraları seçilir. Hər bələdiyyənin məclisi, komitələri və idarəçiləri var. Hər bir qurum bələdiyyə tərəfindən maliyyələşir, həm də yerli vergiləri toplayırlar. Deməliyəm ki,  bələdiyyələr muxtar yerli idarəetmə orqanlarıdır və mərkəzi hökumətdən müstəqil fəaliyyət göstərirlər.

Bu məqamda başqa bir suala keçirəm-

-             Bələdiyyə üzvü olmaq fikri sizdə necə yarandı?

-İlk addım olaraq, bələdiyyə məclisində yerli problemlərin həlli üçün çalışdım, xüsusən tikinti və ekoloji məsələlərə diqqət yetirdim. Bələdiyyə üzvü olmaq fikri, mənə əcnəbi icmaların ehtiyaclarını daha yaxşı müdafiə etmək üçün siyasi proseslərdə birbaşa iştirak etməyin vacibliyini anladıqdan sonra yarandı.

-Həmsöhbətimə sonda,  həm də seçki öncəsi Azərbaycan bələdiyyə üzvlərinə tövsiyələrini soruşdum:

- Fəal olsunlar və yerli icmanın problemlərini yaxından izləsinlər.  Şəffaflığı və hesabatlılığı təmin etsinlər, vətəndaşlarla əlaqələri gücləndirsinlər. Təcrübə mübadiləsi üçün beynəlxalq əlaqələr qursunlar. Həmçinin həmyerlilərimi ekoloji layihələr, mədəniyyət tədbirləri və ictimai iştirakçılıq təşəbbüslərində görmək istərdim. Bununla yanaşı rəqəmsal idarəetmə sahəsində qabaqcıl təcrübələri paylaşmaqda faydalı olardı.

Bu cür əməkdaşlıq həm İsveçdə, həm də Azərbaycanda yerli idarəetmə təcrübəsinin inkişafına töhfə verə bilər.

Fürsətdən istifadə edərək, ilk dəfə Azərbaycanın suveren ərazilərində keçiriləcək  bələdiyyə seçkilərində iştirak edəcək bütün soydaşlarımıza uğurlar arzu edirəm.

Bəli, bu isvecli həmyerlimizlə  ilk söhbətim idi. Maraqlı fikirlərinə görə, təşəkkür edirəm.

Əməkdaşlığımız yeni başlayır. Düşünürəm ki, gələcəkdə birgə layihələrin icra etməklə bələdiyyə sisteminin inkişafına daha böyük töhfələri verə biləcəyik.

Vüqar Tofiqli 

Belediyye.info