BAYRAQDAR MEDİA – Xəbər verdiyimiz kimi, noyabrın 25-də Prezident İlham Əliyev “Azərbaycan Respublikasında bələdiyyələrin birləşməsi yolu ilə yeni bələdiyyələrin yaradılması haqqında” qanunu imzalayıb. Adından da göründüyü kimi, yeni qanun ölkədə bələdiyyələrin sayının növbəti dəfə azaldılması anlamına gəlir.

Bələdiyyələrlə bağlı bu durum nəyi dəyişəcək? Yaxud da bu birləşmənin faydası nədən ibarət olacaq?

BAYRAQDAR MEDİA-nın bu və bənzər suallarına “Bələdiyyələrin Fəaliyyətinin Təbliği” İctimai Birliyinin sədri Vüqar Tofiqli aydınlıq gətirib.

Müsahibimiz əvvəlcə onu qeyd edib ki, hazırda ölkədə 1 min 606 bələdiyyə var. Yeni qanunla onların sayı 685-ə enəcək.

Göründüyü kimi, bələdiyyələrin kəmiyyətində ciddi dəyişiklik baş verir. Bu isə keyfiyyətin yüksəldilməsinə hesablanıb. Elə müsahibimiz də deyir ki, bələdiyyələrin sayının azaldılması onların fəaliyyətinə dövlətin diqqətinin artırılması deməkdir. Eyni zamanda bu, bələdiyyəçilikdə optimallaşdırma və stimullaşdırma hesab edilə bilər.

Vüqar Tofiqli onu da xatırladıb ki, 2024-cü ildə Azərbaycanda bələdiyyələrin fəaliyyətə başlamasının 25 ili tamam olur. Ötən müddət ərzində bir çox bələdiyyələr yetərincə diqqət çəkməyi bacarıb. Ümumiyyətlə isə bələdiyyəçiliyin ən böyük uğuru onların özlərini cəmiyyətə tanıda bilməsi olub. O, qeyd edib ki, bələdiyyələrdən narazılıq da yox deyil. Amma əsas məsələ odur ki, artıq sakinlər yerli əhəmiyyətli məsələlərin həllində bələdiyyənin rolunu anlayır, bunun üçün vergi verməyi də özünə borc bilir.

Müsahibimiz ayrıca qeyd edir ki, bələdiyyələrin birləşdirilməsi – böyüdülməsi onların işində yeni keyfiyyət mərhələsi olacaq. Bununla belə onu da bildirir ki, birləşmə zamanı artıq ləğv ediləcək bələdiyyələrin əməkhaqqı, Dövlət Sosial Müdafiə Fonduna olan borclarının sıfırlanması da yaxşı olardı. Əks təqdirdə yeni qurulacaq bələdiyyələr özlərinə aid olmayan borclarla işə başlamalı olacaq ki, bu da onların işini əngəlləyə bilər.

Vüqar Tofiqli deyir ki, dövlətin yeni qurulacaq bələdiyyələrə maliyyə yardımının artırılması da yerinə düşərdi. Çünki belə olacağı təqdirdə onlar daha effektiv iş qura biləcək. Eyni zamanda bələdiyyə qanunvericiliyi ilə bağlı boşluqların da aradan qaldırılmasına zərurət var. Bəzən gərəkli qanunlar qəbul edilsə də onların icra mexanizmi ilə bağlı proses uzadılır və bu da işə əngəl olur.

Bələdiyyə mütəxəssisi bildirir ki, yeni seçki keçiriləndən və artıq daha böyük bələdiyyələr fəaliyyətə başlayandan sonra həm qanunlarla, həm də maliyyələşdirmə ilə bağlı diqqətli olmaq yerinə düşər. Yeni bələdiyyələr sıfır borcla fəaliyyətə başlasa, daha arxayın işləmək imkanları olacaq.

Vüqar Tofiqli sonda qeyd edib ki, bələdiyyələrin birləşdirilməsi prosesi sakinlərin problemlərinin həllinə müsbət təsir edəcək. O, həm də deyib ki, gələcəkdə də bu cür birləşdirmə proseslərinin davam etdirilməsi vacibdir.

Əlavə edək ki, 1999-cu ildə bələdiyyələr ilk dəfə təşkil edilərkən onların sayı 2 min 736 idi. Sonrakı mərhələdə birləşdirmə yoluyla say azaldılaraq 1 min 606 oldu. İndi isə, göründüyü kimi, ölkədə 685 bələdiyyə olacaq. Yaxın müddətdə bələdiyyələrə seçkilərin elan edilməsi də gözlənilir.

https://www.bayraqdar.info/2024/11/26/birl%c9%99sm%c9%99d%c9%99n-sonra-b%c9%99l%c9%99diyy%c9%99l%c9%99r-daha-effektiv-olacaq/