Xətai Rayon Xətai Bələdiyyəsində 8 Noyabr - Zəfər Günü münasibətilə tədbir keçirilib.

Tədbir başlamazdan əvvəl Azərbaycan xalqının Ümummilli Lideri Heydər Əliyevin və ölkəmizin suverenliyi, ərazi bütövlüyü və müstəqilliyi uğrunda canlarından keçmiş şəhidlərimizin əziz xatirəsi bir dəqiqəlik sükutla yad edilib.

Tədbiri giriş sözü ilə açan Xətai Bələdiyyəsi sədrinin köməkçisi Rövşən Məmmədov Bələdiyyə sədri Elşad Vəliyevin adından kollektivi qarşıdan gələn Zəfər Günü münasibətilə təbrik edib. O, çıxışında 8 Noyabrın Azərbaycan tarixində sadəcə təqvim günü deyil, xalqımızın milli iradəsinin, sarsılmaz birliyinin və dövlətçilik əzminin təntənəsi olduğunu vurğulayıb.

Qeyd olunub ki, Zəfər tarixi xalqımızın onilliklər ərzində qəlbində yaşatdığı torpaq həsrətinin sona çatdığı, milli qürur və ləyaqətimizin bütün dünyaya nümayiş etdirildiyi möhtəşəm bir səhifədir. Bu tarixi Qələbə Azərbaycan Respublikasının Prezidenti, Müzəffər Ali Baş Komandan İlham Əliyevin qətiyyətli siyasi iradəsi, uzaqgörən strategiyası, Azərbaycan Ordusunun qəhrəmanlığı və xalqımızın həmrəyliyi sayəsində əldə olunub.

Daha sonra tədbirdə iştirak edən Bələdiyyə sədrinin müavini Şahmar Əsədov, eləcə də bələdiyyə əməkdaşları Əliyar Əliyev, Elşən Nabatəliyev, Natiq Sayadov, Həmid Həmidov, Nərminə Hacıyeva və Həsən Əliyev mövzu ətrafında çıxış ediblər.

Çıxışlarda 44 günlük Vətən müharibəsinin Azərbaycan xalqının tarixinə qızıl hərflərlə yazıldığı, əldə olunan Zəfərin milli birliyimizin, dövlətə sədaqətimizin və Vətən sevgimizin ən parlaq ifadəsi olduğu diqqətə çatdırılıb. Bildirilib ki, bu Qələbə yalnız hərbi uğur deyil, həm də Azərbaycan xalqının tarixi ədalətin bərpasına olan inamının və milli qürurunun təntənəsidir.

Natiqlər xüsusi olaraq vurğulayıblar ki, Zəfərin arxasında dayanan ən böyük mənəvi güc Vətən uğrunda canından keçən şəhidlərimizin müqəddəs fədakarlığı, qazilərimizin qəhrəmanlığı və xalqımızın sarsılmaz həmrəyliyidir. Şəhidlərimizin bizə əmanət etdiyi Vətən torpağını qorumaq, dövlətimizin güclənməsinə töhfə vermək və gələcək nəsillərə qalib Azərbaycanın tarixini çatdırmaq hər bir vətəndaşın mənəvi borcudur.

Tədbirdə, həmçinin Zəfər Gününün gənc nəslin vətənpərvərlik ruhunda tərbiyəsində, milli-mənəvi dəyərlərə bağlılığın möhkəmləndirilməsində və dövlətçilik düşüncəsinin inkişafında mühüm əhəmiyyət daşıdığı qeyd edilib.

Bildirilib ki, bu gün Azərbaycanın qarşısında duran əsas vəzifələrdən biri qazanılmış tarixi nailiyyətləri qorumaq, ölkəmizin davamlı inkişafına töhfə vermək və Zəfər ruhunu gündəlik fəaliyyətimizdə yaşatmaqdır. Yerli özünüidarəetmə orqanı olaraq bələdiyyələrin də üzərinə düşən məsuliyyət yalnız inzibati vəzifələrin icrası ilə məhdudlaşmır. Dövlətçilik dəyərlərinin təbliği, milli həmrəyliyin gücləndirilməsi, şəhid ailələrinə və qazilərə diqqət və qayğının göstərilməsi bu fəaliyyətin mühüm mənəvi istiqamətlərindəndir.

Səmimi və vətənpərvərlik ruhunda keçən tədbirin sonunda bir daha vurğulanıb ki, 8 Noyabr Azərbaycan xalqının heç vaxt unudulmayacaq qəhrəmanlıq salnaməsidir.

Zəfər bir xalqın yalnız qazandığı Qələbə deyil, həm də gələcəyinə daşıdığı məsuliyyətdir. Bu gün biz qalib xalqın nümayəndələri kimi azadlığımızın, suverenliyimizin və dövlətçiliyimizin qədrini bilməli, şəhidlərimizin əziz xatirəsini daim uca tutmalıyıq.

Yaşasın müstəqil Azərbaycan!

Yaşasın Müzəffər Ali Baş Komandan!

Eşq olsun Azərbaycan Ordusuna!

Xətai bələdiyyəsi