Bakı şəhərində fəaliyyət göstərən 45 bələdiyyədən 37-də cari ilin ilk doqquz ayı ərzində yerli vergilər üzrə daxilolmalar ötən ilin müvafiq dövrü ilə müqayisədə müxtəlif faizlərlə artıb. Artımın səviyyəsi ən aşağı göstərici olan 0,7 faizdən başlayaraq 2,4 dəfəyədək yüksəlib. Bununla yanaşı, səkkiz bələdiyyədə büdcə gəlirlərinin həcmində azalma qeydə alınıb. Həmin bələdiyyələrdən biri də Nizami rayonu Keşlə bələdiyyəsidir.

Belə ki, ötən ilin ilk on ayında Keşlə bələdiyyəsinin büdcə gəlirləri 199 min 340 manat təşkil etdiyi halda, cari ilin eyni dövründə bu göstərici 178 min 500 manata bərabər olub. Ötən ilin müvafiq dövründə büdcəyə əmlak vergisi üzrə 149 min 550 manat, torpaq vergisi üzrə isə 46 min 741 manat daxil olmuşdursa, cari ilin on ayında bu rəqəmlər müvafiq olaraq 131 min 56 manat və 45 min 214 manat təşkil edib. Göründüyü kimi, həm əmlak, həm də torpaq vergisi üzrə daxilolmalarda azalma müşahidə olunub.

Bəs, büdcə gəlirlərində yaranmış bu geriləmənin əsas səbəbləri nədir? Vergi daxilolmalarının azalmasına hansı amillər təsir göstərib? Hazırda bələdiyyədə vergi-uçot sisteminin vəziyyəti necədir və mövcud problemlərin aradan qaldırılması istiqamətində hansı addımlar atılır?

Bu və digər suallara aydınlıq gətirmək məqsədilə Keşlə bələdiyyəsinə üz tutduq.

Bələdiyyədə iş günü öz axarı ilə davam edirdi. Əməkdaşlar, xüsusilə də vergi xidmətinin işçiləri gündəlik vəzifələrinin icrası ilə məşğul idilər. Bələdiyyənin sədri Rəşad Babayev və vergi xidmətinin rəhbəri Nigar Rəsulzadə ilə görüşərək mövcud vəziyyət, qarşıya çıxan çətinliklər və onların həlli istiqamətində görülən işlərlə maraqlandıq.

Söhbət zamanı bələdiyyə sədri Rəşad Babayev bildirdi ki, büdcə gəlirlərində yaranmış azalmanın aradan qaldırılması və əvvəlki illərin göstəricilərinə yaxınlaşmaq üçün bələdiyyədə ciddi müzakirələr aparılır. Mövcud vəziyyət ətraflı təhlil edilir, gəlirlərin artırılması üçün müxtəlif təkliflər nəzərdən keçirilir. Onun sözlərinə görə, qarşıdakı aylarda ötən illə müqayisədə yaranmış fərqin mümkün qədər azaldılması üçün bütün zəruri tədbirlər görüləcək.

Rəşad Babayev qeyd etdi ki, hazırda əsas diqqət bələdiyyənin vergi-uçot sisteminin təkmilləşdirilməsinə, vergi ödəyiciləri haqqında məlumatların dəqiqləşdirilməsinə və məlumat bazasının sistemli şəkildə yenilənməsinə yönəldilib. Bu istiqamətdə təkrarçılıq hallarının aradan qaldırılması, mövcud məlumatların yoxlanılması, çatışmayan bilgilərin tamamlanması və hər bir vergi ödəyicisi barədə dolğun məlumatların bazaya daxil edilməsi istiqamətində işlər aparılır.

Hazırda bələdiyyənin məlumat bazasında 5 mindən artıq vergi ödəyicisi haqqında məlumat yerləşdirilib. Qarşıya qoyulan əsas vəzifələrdən biri bu bazanın daha da təkmilləşdirilməsi, məlumatların dəqiqliyinin təmin olunması və vergi inzibatçılığının müasir tələblərə uyğun qurulmasıdır.

Sədrin sözlərinə görə, növbəti ildən vergi bildirişlərinin onlayn qaydada göndərilməsinin nəzərdə tutulması bu baxımdan mühüm əhəmiyyət daşıyır. Elektron bildiriş sisteminin tətbiqi, bir tərəfdən, vergi xidmətinin işinin daha çevik və səmərəli təşkilinə, digər tərəfdən isə vergi ödəyicilərinin məlumatlandırılmasının asanlaşdırılmasına imkan yaradacaq. Bununla yanaşı, hər bir vergi ödəyicisi haqqında məlumatların əvvəlcədən dəqiqləşdirilməsi, müvafiq qeydlərin aparılması və məlumat bazasının daim aktual saxlanılması zərurəti də artır.

Rəşad Babayev vurğuladı ki, bələdiyyənin fəaliyyətində əsas prioritet yalnız büdcə gəlirlərinin artırılması deyil, həm də sakinlərin müraciətlərinə həssas yanaşmaq, onların gündəlik həyatında qarşılaşdıqları problemlərin həllinə dəstək göstərməkdir.

“Bütün hallarda məqsədimiz sakinlərə xidmət etməkdən ibarətdir. Bizim üçün bələdiyyəyə müraciət edən hər bir sakinin problemi diqqət mərkəzində olmalıdır. Odur ki, bütün qüvvəmizi səfərbər etməklə büdcə gəlirlərindəki azalmanı aradan qaldırmağa, vergi-uçot sistemini daha da təkmilləşdirməyə və bələdiyyəyə müraciət edən hər bir sakinin qaldırdığı problemin həllinə çalışırıq. Hesab edirik ki, yerli özünüidarəetmə orqanının nüfuzu, ilk növbədə, sakinlərin etimadını qazanmaq və onların problemlərinə real həll yolları tapmaqla formalaşır”, – deyə sədr bildirdi.

Görüş zamanı Keşlə bələdiyyəsinin vergi xidmətinin rəhbəri Nigar Rəsulzadə də mövcud vəziyyətlə bağlı fikirlərini bölüşdü. O qeyd etdi ki, xidmət əməkdaşları vergi ödəyiciləri ilə mütəmadi görüşlər keçirir, onlara yerli vergilərin ödənilməsi qaydaları barədə məlumat verir, yaranan sualları cavablandırır və ödənişlərin vaxtında həyata keçirilməsinə çalışırlar.

Bununla belə, vergi xidmətinin qarşılaşdığı əsas çətinliklərdən biri bəzi vergi ödəyicilərinin öhdəliklərini vaxtında yerinə yetirməməsi, müəyyən hallarda isə vergidən yayınmağa üstünlük verməsidir. Bu vəziyyət büdcə daxilolmalarına mənfi təsir göstərməklə yanaşı, vergi xidmətinin gündəlik fəaliyyətində də əlavə çətinliklər yaradır.

Nigar Rəsulzadə bildirdi ki, bütün bu çətinliklərə baxmayaraq, xidmətin qarşısında konkret hədəflər müəyyənləşdirilib. Məqsəd ilin sonunadək büdcə gəlirlərində yaranmış geriləməni mümkün qədər aradan qaldırmaq, vergi ödəyiciləri ilə işin keyfiyyətini yüksəltmək və daxilolmaların davamlılığını təmin etməkdir.

Onun sözlərinə görə, hazırda növbəti il üçün bələdiyyə büdcəsinin layihəsi üzərində də iş aparılır. Büdcə layihəsi hazırlanarkən mövcud maliyyə imkanları, gəlir mənbələri, qarşıya çıxan problemlər və onların aradan qaldırılması yolları ətraflı nəzərdən keçirilir. Bütün bu məsələlər bələdiyyə sədrinin və üzvlərinin yaxından iştirakı ilə müzakirə olunur. Əsas məqsəd real maliyyə imkanlarına əsaslanan, eyni zamanda gəlirlərin artırılmasını və sakinlərə göstərilən xidmətlərin yaxşılaşdırılmasını nəzərdə tutan büdcə formalaşdırmaqdır.

Nigar Rəsulzadə onu da qeyd etdi ki, vergi xidmətinin fəaliyyətində məlumat bazasının dəqiqliyi, vergi ödəyiciləri ilə müntəzəm əlaqələrin qurulması və elektron imkanlardan səmərəli istifadə xüsusi əhəmiyyət daşıyır. Bu istiqamətdə aparılan işlərin gələcəkdə müsbət nəticələr verəcəyinə və bələdiyyənin maliyyə vəziyyətinin yaxşılaşmasına töhfə göstərəcəyinə inanırlar.

Görüş çərçivəsində Keşlə bələdiyyəsinin qarşısında duran digər məsələlər, o cümlədən maliyyə vəziyyətinin yaxşılaşdırılması, yerli vergi inzibatçılığının gücləndirilməsi, uçot sisteminin təkmilləşdirilməsi və Bələdiyyələrin Vahid İnformasiya Sisteminin imkanlarından daha geniş istifadə olunması barədə də fikir mübadiləsi apardıq.

Biz də öz növbəmizdə bələdiyyənin maliyyə dayanıqlığının möhkəmləndirilməsi, vergi ödəyiciləri haqqında məlumatların sistemləşdirilməsi, uçotda mümkün uyğunsuzluqların aradan qaldırılması və müasir informasiya texnologiyalarının tətbiqi ilə bağlı bir sıra təklif və tövsiyələrimizi diqqətə çatdırdıq. Xüsusilə qeyd etdik ki, vergi bazasının mütəmadi yenilənməsi, elektron bildiriş imkanlarının genişləndirilməsi və vergi ödəyiciləri ilə maarifləndirici işin gücləndirilməsi yerli büdcə gəlirlərinin artırılması baxımından mühüm əhəmiyyət kəsb edir.

Əlbəttə, bələdiyyələrin maliyyə imkanlarının genişləndirilməsi yalnız vergi yığımının artırılması ilə məhdudlaşmır. Bunun üçün dəqiq uçot sistemi, şəffaf idarəetmə, vergi ödəyiciləri ilə sağlam münasibətlər və sakinlərin bələdiyyəyə inamı da vacib şərtlərdəndir. Sakinlər ödədikləri yerli vergilərin yaşadıqları ərazinin abadlaşdırılmasına, sosial problemlərin həllinə və ictimai xidmətlərin yaxşılaşdırılmasına yönəldiyini gördükdə onların vergi öhdəliklərinə münasibəti də müsbət istiqamətdə dəyişir.

Keşlə bələdiyyəsində apardığımız müşahidələr və keçirdiyimiz görüş göstərdi ki, mövcud maliyyə geriləməsinin aradan qaldırılması üçün müəyyən işlər görülür, vergi xidmətinin qarşısında konkret vəzifələr qoyulub. İndi əsas məsələ bu tədbirlərin ardıcıl şəkildə həyata keçirilməsi, müəyyənləşdirilən hədəflərə nail olunması və əldə edilən nəticələrin büdcə göstəricilərində öz əksini tapmasıdır.

İnanırıq ki, Keşlə bələdiyyəsinin rəhbərliyi və vergi xidməti yaranmış vəziyyətlə barışmayacaq, mövcud potensialdan, xüsusilə də kadr imkanlarından səmərəli istifadə etməklə büdcə gəlirlərinin artırılması istiqamətində səylərini davam etdirəcək. Bu, həm də bələdiyyənin əvvəlki illərdə formalaşmış nüfuzunun qorunub saxlanılması və daha da möhkəmləndirilməsi baxımından vacibdir.

Əsas olan isə odur ki, bələdiyyə yalnız vergi toplayan qurum kimi deyil, həm də sakinlərin problemlərini dinləyən, onların həllinə çalışan və yerli əhalinin maraqlarını təmsil edən bir özünüidarəetmə orqanı kimi fəaliyyət göstərsin. Rəşad Babayevin də vurğuladığı kimi, bələdiyyəyə müraciət edən hər bir sakinin qaldırdığı problemin həllinə çalışmaq bu fəaliyyətin başlıca məqsədlərindən biri olmalıdır.

Belediyye.info