“Cari ildə büdcə gəlirlərimizi müəyyən mənada artıra bilsək də əldə etdiyimiz nəticə bizi qane etmir”- bu fikirləri Belediyye.infoya Xəzər rayonu Buzovna Bələdiyyəsinin sədri Mətləb Əliyev  bildirib.

Sədrin sözlərinə görə, cari ildə bələdiyyənin vergi xidmətinin əsas məqsədi büdcə gəlirlərini artırmaq, borclu vergi ödəyiciləriylə maarifləndirici görüşləri təşkil etməklə onları vergiyə cəlb etməkdən ibarət olub.

Lakin sakinlərin bir xeyli qisminin əmlaklarına çıxarışlarının olmadığına görə onları vergiyə bəzi hallarda cəlb etmək mümkün olmur.

Sənədsiz mənzilə çıxarışın alınmasında bəzi bürokratik əngəllər və rüsümların yüksək olması  nəticədə vətəndaşı bezdirir və  sakin sənədləşdirmə prosesindən vaz keçir.

Əgər ərazidə olan əmlakların hamısının hüquq sənədi olmuş olsaydı onda bələdiyyənin də büdcə gəlirləri iki dəfəyədək artırmış olardıq.

Təəssüf  edirik ki, bir çox hallarda sakinlər yaratdıqları borcu ödəmək əvəzinə etiraz əlaməti olaraq bələdiyyə iclasının qəbul etdiyi qərarlardan inzibati məhkəməyə müraciət edirlər.

Sədr qeyd edib ki, cari ildə büdcə gəlirlərimizi 18 faizədək artıra bilmişik. Əldə etdiyimiz maliyyə vəsaitinin böyük bir hissəsi Buzovna qəsəbəsinin abadlıq işlərinə xərclənməkdədir. Şəhid və qazi ailələrinə maddi və mənəvi dəstəyin göstərilməsi bu gün  bələdiyyənin əsas vəzifələrindəndir.

Bu gün bələdiyyəmiz hər daim  Prezident İlham Əliyevin yürütdüyü siyasətini dəstəkləməklə  vətəndaş məmnunluğunun təmin edilməsinə çalışır və bu məsələyə həssaslıqla yanaşır.

Nəzərə alaq ki, növbəti ildə həm də bələdiyyə seçkiləri keçiriləcək, demək biz bələdiyyə üzvlərinin üzərinə böyük məsuliyyət yükü düşür.

Belediyye.info