“Şəhid analarına qayğı və diqqətin göstərilməsi daim Vəndam bələdiyyəsinin diqqət mərkəzindədir” bu fikirləri Belediyye.infoya adıçəkilən bələdiyyənin sədri Asif Həçşimov bildirib.

Sədrin sözlərinə görə, bu gün Qəbələ rayonunun Vəndam bələdiyyəsinin Seyidqışlaq kənd sakini 2-ci Qarabağ müharibəsində şəhid olan Aqşin Qədirzadənin anası Səbinə Qədirova ziyarət olunub. 8 Mart Beynəlxalq Qadınlar Bayramı münasibətiylə şəhid anası təbrik edilmiş, ona sağlıqlı ömür arzulanmış və  bələdiyyə tərəfindən alınan hədiyyə təqdim edilmişdir.

Qeyd edək ki, Aqşin Qədirzadə 10 mart 1999-cu ildə Qəbələ rayonunun Seyidqışlaq kəndində anadan lub. 2014-ci ildə Seyidqışlaq kənd məktəbinin 9-cu sinfini bitirmişdir. 2016-cı ildə çilingər peşəsinə yiyələnmək üçün Qəbələ rayonu Peşə məktəbinə getmişdir. 2017-ci ildə peşə təhsilini yarımçıq qoyaraq hərbi xidmətə yollanıb.

Aqşin Qədirzadə 2017–2018-ci illərdə Ədliyyə Nazirliyində müddətli həqiqi hərbi xidmət keçmişdir. Hərbi xidmətini başa vurduqdan sonra kənddə bir neçə ay işlədikdən sonra yenidən Ordu Sıralarında xidmət üçün 15 may 2019-cu ildə kursa başlayıb, 12 iyul 2019-cu ildə həmin kursu moto atıcı manqa komandiri vəzifəsi ilə bitirmişdir. Şəmkirin Seyfəli kəndində müddətdən artıq xidmət edən hərbi qulluqçu kimi xidmət edib. Tovuz döyüşləri zamanı da döyüşlərdə iştirak etmişdir.

Azərbaycan Silahlı Qüvvələrinin müddətli həqiqi hərbi xidmət hərbi qulluqçusu olan Aqşin Qədirzadə 2020-ci il sentyabrın 27-də Azərbaycan və Ermənistan arasında başlanan İkinci Qarabağ müharibəsi zamanı Murovdağ döyüşlərində savaşıb. Murovdağda gedən döyüşlər zamanı oktyabrın 4-də itkin düşmüşdür. Oktyabrın 18-i şəhid olduğu xəbəri gəlmişdir. Aqşin Qədirzadə dekabrın 18-də Qəbələ rayonunun Seyidqışlaq kəndindəki "Dəşmir"  qəbirstanlığında dəfn olunmuşdur. 

Ölümündən sonra "Vətən uğrunda" və "Kəlbəcərin azad edilməsi" uğrunda medalları ilə təltif edilib. 

Belediyye.info